Naýryz merekesinde aýa raıy qandaı bolady
ASTANA. KAZINFORM — Qazaqstanda aldaǵy kúnderi aýa temperatýrasy aıtarlyqtaı joǵarylap, keı óńirlerde +20°S-qa deıin jetýi múmkin. Bul týraly «Qazgıdromet» RMKK baspasóz hatshysy Arýjan Muratova málimdedi.
Onyń aıtýynsha, eldiń ońtústik-batys aımaqtarynda jyly aýa raıy saqtalady, al soltústik óńirlerde atmosferalyq fronttardyń ótýi baıqalady. Nátıjesinde batysta aýa temperatýrasy +10°S-qa, ońtústikte +15°S-qa deıin kóteriledi.
Maman bul kórsetkishterdiń qalypty klımattyq normaǵa saı ekenin atap ótti, ıaǵnı, bul — jyl saıyn qaıtalanatyn tabıǵı úrdis.
Sınoptıkterdiń boljamynsha, soltústik jáne shyǵys óńirlerde de aýa temperatýrasy birtindep joǵarylaıdy. Alaıda bul aımaqtarda kóktaıǵaq, jeldiń kúsheıýi jáne tuman túsýi múmkin.
— Eldiń soltústiginde jáne ońtústiktiń taýly aımaqtarynda aýa raıy turaqsyz bolady. Atmosferalyq fronttardyń áserinen jaýyn-shashyn (jańbyr men qar), kóktaıǵaq jáne ekpindi jel kútiledi. Respýblıka boıynsha keı jerlerde tuman túsýi yqtımal. Biraq, mamandar qazaqstandyqtar Naýryz merekesin jaımashýaq, jyly aýa raıynda qarsy alady dep boljap otyr, — dedi Arýjan Muratova Jibek Joly telearnasynyń «Búgin Live» baǵdarlamasynda.
Aıta keteıik, jaqynda álemdegi eń úlken shól sanalatyn Saharada qar jaýdy.
