Naqty ispen dáleldeımiz - senator Asqar Beısenbaev

ASTANA. QazAqparat - Bıylǵy jyl elimiz úshin «Nur Otan» partııasynyń 20 jyldyǵy atalyp ótiletin mańyzdy jyl bolyp tabylady. Osydan 20 jyl buryn kóshbasshymyz Nursultan Nazarbaevtyń janyna toptasqan azamattar «Otan» halyqtyq-demokratııalyq partııasyn tirkeý týraly biraýyzdan sheshim qabyldaǵan bolatyn. Senat depýtaty, Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy Asqar Beısenbaevtyń pikirinshe, osy jyldarda Elbasy bastaǵan partııa elimizdegi saıası jáne qoǵamdyq jańarýlardyń qozǵaýshy kúshine aınaldy.

Memleket basshysy «Nur Otan» partııasynyń XVIII sezinde áleýmettik qoldaýdy kúsheıtý jáne halyqtyń ómir súrý sapasyn arttyrý jónindegi aýqymdy sharalardy usyndy. Osy sharalardy iske asyrý úshin Memleket basshysynyń tapsyrmasy boıynsha respýblıkalyq bıýdjet pen Ulttyq qordan qomaqty qarjy bólinedi. Tek bıyldyń ózinde elimiz bıýdjetiniń 45 paıyzy áleýmettik salaǵa jiberiletin boldy.

Sezde halyqqa arnalǵan asa mańyzdy máseleler - balalardyń járdemaqysy, turǵyn úımen qamtý, áleýmettik salany jańǵyrtý jáne basqa da aýqymdy mindetter belgilendi.

Qazaqstan Prezıdenti halyqtyń áleýmettik álsiz toptaryn qoldaýdyń mańyzdylyǵyn atap ótti. Jańa áleýmettik saıasat eldegi turaqtylyqty qamtamasyz etýge jáne Qazaqstannyń barlyq azamattaryna birdeı alǵa basý sharttaryn jasaýǵa tıis. Bul eń aldymen halyqtyń áleýmettik álsiz toptary men jastarǵa qatysty bolyp otyr. Kóp balaly, tabysy az otbasylar erekshe qamqorlyqqa alynyp, nazarda bolady. Qamtylýy tómen otbasylardyń kúnkóris deńgeıiniń tómengi shegi 70 paıyzǵa deıin ulǵaıatyn boldy. Ataýly áleýmettik kómek úshin kóp balaly otbasyndaǵy ár balaǵa 21 myń teńgege jýyq tólem beriletin bolady.

Qazaqstandyqtardy turǵyn úımen qamtamasyz etý jónindegi jumystar qarqyn ala túsedi. Elbasy 40 myńnan astam jalǵa beriletin páter salýǵa jáne osy maqsatta jyl saıyn 50 mıllıard teńge bólý jóninde tapsyrma berdi. Kóp balaly, tolyq emes jáne tabysy az otbasylar úshin Turǵyn úı qurylys jınaq bankisi arqyly jylyna 2 paıyzdyq baǵdarlama ázirlenetin bolady.

Eldi áleýmettik jańǵyrtý jónindegi jańa mindetterdi iske asyrýdy kózdeıtin jańa úkimet quryldy, ol naqty nátıjege baǵyttalǵan irgeli isterdiń úkimeti bolýǵa tıis. Memleket basshysy Úkimet aldyna halyq ómiriniń deńgeıi men sapasyn arttyrý, tabysy az azamattardyń turǵyn úı máselelerin sheshý, bilim berý jáne densaýlyq saqtaý, aımaqtardy keshendi túrde damytýǵa baǵyttalǵan basym mindetterdi qoıdy.

«Nur Otan» partııasynyń mereıtoılyq seziniń delegattary qundylyq baǵdaryn bekemdeýge jáne partııanyń aldaǵy ondaǵan jyldardaǵy mıssııasyn aıqyndaýǵa baǵyttalǵan jańa saıası doktrınasyn qabyldady.

Ekonomıkany damytý men azamattardyń áleýmettik ál-aýqatyn arttyrýdyń eń ózekti máselelerine nazar aýdarý asa mańyzdy. Bul túıtkilderdi sheshý bizdiń partııamyzdyń birinshi kezektegi basymdyǵy bolyp tabylady.

Búgingi kúni partııa músheleriniń aldynda Memleket basshysynyń tapsyrmalaryn iske asyrý mindetteri tur. Otanymyz - Qazaqstan Respýblıkasyn órkendetý jolyndaǵy El Prezıdenti - «Nur Otan» partııasy tóraǵasynyń áleýmettik jáne saıası reformalar jónindegi bastamalaryn júzege asyrýda biz onyń senimdi tiregi ekenimizdi naqty istermen, aıqyn nátıjemen dáleldeýimiz kerek dep oılaımyn.