Muhtar Taıjan: Latyn álipbıi Qazaqstanǵa kerek

ASTANA. QazAqparat - B.Taıjan atyndaǵy qordyń basshysy Muhtar Taıjan Memleket basshysynyń latyn álipbıine kóshýdiń naqty kestesin ázirleý týraly tapsyrmasyna pikir bildire kele, latynshaǵa kóshý úrdisin durys ári qajetti qadam ekenin aıtty, dep habarlaıdy QazAqparat.

«Latyn álipbıi Qazaqstanǵa kerek. Bul óte durys qadam, sebebi búginde barsha álem latyn qarpin paıdalanyp júr. Kez kelgen gadjet, ınternet, kompıýter, sondaı-aq aqparattyń basym bóligi latyn álipbıinde. Bizdiń baýyrlas elder, ıaǵnı túrikter, ózbekter, túrkimender latynǵa kóshkeni belgili. Men bul usynysty qoldaımyn»,-dep toqtaldy M. Taıjan Parlament Májilisinde tilshiler saýalyna jaýap berý kezinde.

Osy oraıda ol bul baǵyttaǵy bastamanyń júzege asýyna erekshe mán berý kerektigin atap ótti.

Muhtar Taıjan Úkimet tarapy latyn álipbıine kóshý sharalaryn tıisti deńgeıde iske asyrýǵa qaýqarly bolatyndyǵyna senim bildirdi.

«Ózbekstanda birneshe jyl boıy eki álipbıde jazýǵa múmkin boldy. Sondyqtan da ótpeli kezeń bolatyny belgili. Jalpy latynǵa kóshý úrdisin durys dep sanaımyn», - dep túıindedi sózin qoǵam qaıratkeri.

Aıta keteıik, QR Prezıdenti Nursultan Nazarbaev «Egemen Qazaqstan» gazetine shyqqan maqalasynda latyn álipbıine kóshýdiń naqty kestesin ázirleýdi tapsyrǵan bolatyn.

Elbasy 2017 jyldyń aıaǵyna deıin ǵalymdardyń kómegimen, barsha qoǵam ókilderimen aqyldasa otyryp, qazaq álipbıiniń jańa grafıkadaǵy biryńǵaı standartty nusqasyn qabyldaý kerektigin de jetkizdi. Al 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisken durys dep sanaıdy.