Mońǵolııanyń syrtqy saýda aınalymy 2,6 mlrd AQSh dollaryna jetti
ASTANA. KAZINFORM — Bıylǵy qańtar aıynda Mońǵolııa 105 elmen saýda júrgizip, syrtqy saýdanyń jalpy kólemi 2,6 mlrd AQSh dollaryn qurady, dep habarlaıdy Montsame.
Onyń ishinde eksport kólemi 1,7 mlrd dollar bolsa, ımport 843,0 mln dollar shamasynda boldy. Saýda balansynyń profıtsıti 906,5 mln dollar bolǵan. Bul týraly Ulttyq statıstıka komıteti habarlady.
Ótken jyldyń osy kezeńimen salystyrǵanda jalpy saýda kólemi 30,7%-ǵa nemese 608,9 mln dollarǵa artqan. Bul rette eksport 71,6%-ǵa nemese 730,2 mln dollarǵa ósti. Saýda balansynyń profıtsıti 16,5 esege nemese 851,5 mln dollarǵa ulǵaıdy. Al ımport kerisinshe 12,6%-ǵa nemese 121,3 mln dollarǵa qysqardy.
Eksporttyń ósýi myna taýar jetkizilimderiniń artýymen baılanysty:
— mys keni men kontsentraty — 462,3 mln dollarǵa;
— kómir — 167,6 mln dollarǵa;
— óńdelmegen nemese jartylaı óńdelgen altyn — 95,5 mln dollarǵa;
— konservilengen et ónimderi — 8,3 mln dollarǵa;
— flıýorıt keni men kontsentraty — 15 mln dollarǵa;
— myrysh keni men kontsentraty — 6 mln dollarǵa;
— shıki munaı — 5,6 mln dollarǵa;
— molıbden keni men kontsentraty — 2,5 mln dollarǵa.
Importtyń tómendeýi ótken jyldyń sáıkes kezeńimen salystyrǵanda myna jetkizilimderdiń qysqarýymen túsindiriledi:
— jeńil avtokólikter — 73,1 mln dollarǵa;
— júk kólikteri — 36,1 mln dollarǵa;
— kólik quraldarynyń qosalqy bólshekteri — 17,6 mln dollarǵa;
— dızel otyny — 13 mln dollarǵa;
— býldozerler men ekskavatorlar — 7,5 mln dollarǵa.
Sonymen qatar, benzın jetkizilimi 26,8 mln dollarǵa, azot tyńaıtqyshtary 5,8 mln dollarǵa, al dári-dármek 3,5 mln dollarǵa artqan.
Aldyńǵy aımen salystyrǵanda eksport 11%-ǵa nemese 215,2 mln dollarǵa, ımport 23,8%-ǵa nemese 263,9 mln dollarǵa azaıǵan.
Eksporttyń 96,7%-yn mıneraldyq ónimder, baǵaly tastar, zergerlik buıymdar jáne negizgi metaldar quraıdy. Al ımporttyń 72%-y mıneraldyq ónimderge, mehanıkalyq, elektr tehnıkalyq jáne kólik jabdyqtaryna, olardyń qosalqy bólshekterine, sondaı-aq negizgi metaldar men olardan jasalǵan buıymdarǵa tıesili.
Osyǵan deıin Mońǵolııa naryǵyna Qazaqstan taýarlaryn eksporttaý jeńildegenin jazǵan edik.