Mońǵolııada «Jylqy kúni» merekesi ótti
ASTANA. KAZINFORM — Mońǵolııa shabandozdary qaýymdastyǵynyń «Hýshhan» brendi jáne «Aspan kóshpendisi» jobasymen birlesip uıymdastyrýymen «Jylqy kúni» is-sharasy ótti, dep habarlaıdy Montsame.
Іs-sharaǵa 13 aımaq pen 3 aýdannan 37 shabandoz qatysqan.
Sharanyń negizgi maqsaty — qysqy týrızmdi qoldaý, kóshpeli ómir salty men jylqy sharýashylyǵyn nasıhattaý, mońǵol jylqysynyń qundylyǵyn arttyrý, materıaldyq emes mádenı murany saqtaý, dástúrdi jas urpaqqa jetkizý jáne jylqy brendıngin qalyptastyrý.
Baǵdarlama shabandozdar sherýimen bastalyp, dástúrli jarystardy qamtydy.
Atap aıtqanda, tolyq shabys kezinde jerden ýrga men qamshy ilý, jylqy ustaý jáne úıretý, sondaı-aq jaıaý júrip arqan men ýrga laqtyrý saıystary ótti.
Jarys qorytyndysy boıynsha birinshi oryndy Tóv aımaǵy Batsúmber somonynan qatysqan jylqyshy R. Púrevdorj ıelendi. Ekinshi oryn Dornogov aımaǵy Delgereh somonynyń ókili Ts. Gombodorjǵa buıyrdy. Úshinshi oryn Hentıı aımaǵy Mýrýn somonynan O. Tsolmonbaatarǵa, tórtinshi oryn Býlgan aımaǵy Baıan-Nýýr somonynan B. Baıanbaatarǵa, al besinshi oryn Tóv aımaǵy Argalant somonynan B. Baasansýqqa berildi.
Sonymen qatar ulttyq kıimdegi eń úzdik qatysýshy anyqtalyp, qonaqtarǵa dala shaıy usynyldy.
Budan bólek, mońǵoldyń baqtashy jáne ańshylyq ıt tuqymdarynyń tanystyrylymy uıymdastyrylyp, otandyq óndirýshilerdiń saýda aımaqtary jumys istedi.
Aıta ketelik 2026 jylǵy Qysqy Olımpıada oıyndaryna qatysatyn Mońǵolııa ulttyq quramasynyń saltanatty jáne kúndelikti formalary alǵash ret kórsetilgen edi.