Mońǵolııa men EAEO 367 taýardy kedendik bajsyz eksporttaýǵa kelisti

ASTANA. KAZINFORM — Uly memlekettik Hýraldyń plenarlyq otyrysynda Mońǵolııa men Eýrazııalyq ekonomıkalyq odaq (EAEO) arasyndaǵy ýaqytsha saýda kelisimin ratıfıkatsııalaý bekitildi. Bul kelisim buryn baj salynyp kelgen 367 taýardy kedendik bajsyz eksporttaýǵa múmkindik beredi.

Sonymen qatar, kelisim Mońǵolııaǵa EAEO elderinen elde óndirilmeıtin 367 azyq-túlik túrin, budan bólek aýyr tehnıka men jabdyqtardy, hımııalyq jáne azot tyńaıtqyshtaryn ákelýge ruqsat beredi.

Úkimettiń pikirinshe, bul shara shıkizatqa táýeldi emes taýarlardyń eksportyn, jumyspen qamtýdy jáne ekonomıkalyq belsendilikti arttyrýǵa oń áser etedi. Mysaly, kelisimge sáıkes keden rásimderi tórt saǵatqa deıin qysqarady. Sonymen qatar, quny 5000 eýroǵa deıingi taýarlar úshin eksportshylarǵa tek shyǵý tegi sertıfıkatyn daıyndaý qajet bolady, bul otandyq bıznes úshin rásimderdi jeńildetedi.

Kelisim tek 367 taýarǵa ǵana qatysty jáne ınvestıtsııalar, qyzmet kórsetý saýdasy, banktik qyzmetter men tólemder salalaryn qamtymaıdy. Onyń artyqshylyqtary: keden organdary arasyndaǵy yntymaqtastyqty nyǵaıtý, operatsııalardyń jyldamdyǵyn qamtamasyz etý, syrtqy saýdadaǵy qıyndyqtardy sheshý jáne shyǵyndardy azaıtý.

Mońǵolııa men EAEO arasyndaǵy ýaqytsha saýda kelisimi úsh jylǵa jasalǵan jáne taraptar basqa shartqa kelispegen jaǵdaıda avtomatty túrde uzartylatyn bolady.

2024 jyly Mońǵolııa dúnıe júziniń 162 elimen saýda jasaǵan, syrtqy saýda kólemi 27,4 mlrd AQSh dollaryna jetken, onyń ishinde eksport — 15,8 mlrd, ımport — 11,6 mlrd dollar, saýda balansyndaǵy oń saldo — 4,2 mlrd dollar boldy.

Osydan buryn Mońǵolııa jem-shóp pen unǵa baj salyǵyn ýaqytsha toqtatqany anyqtaldy.