«Mınıstrler qaıda ketti?» - baspasózge sholý
«Artyq qylamyn dep, tyrtyq qyldy», degen osyndaıda aıtylsa kerek. Jaqynda Báıdibek aýdanynda bir sotqa aryzdanýshy máselesi tez sheshýdiń tóte jolyn tabamyn dep basy daýǵa qaldy. Ol isti paıdasyna sheshý úshin sýdıaǵa bara bermeı, para berýdi jón sanapty. Taǵy máselesin sýdıanyń zaıyby arqyly sheshpek bolǵanyn qaıtersiń?! Qaı jerde, qandaı qyzmet atqaratynyn aldyn ala bilip alyp, áıeldiń kabınetine kirip barǵan da, az-kem áńgimege tartqannan keıin áı-shaıǵa qaramastan konvertin tastap ketken kórinedi»,-dep jazady «Egemen Qazaqstan» gazeti «Alqabıler arasynda da ala-qulalyq bar» atty maqalada. Áıel quzyrly organdarǵa habarlasyp, bólmeniń esigi mórlenip, keıinirek tekserý barysynda shynynda para retinde tastap ketken 50 myń teńge tabylǵan, qazir bul is boıynsha tergeý júrip jatyr.
Osy basylymnyń jazýynsha, Aqtóbe oblysy boıynsha qarjy polıtsııasy departamentine M. degen azamattan Aqtóbe bólimshelik kóliktegi memlekettik sanıtarlyq-epıdemıologııalyq qadaǵalaý basqarmasynyń jetekshi mamany J. Ótegenovtiń Aqtóbe stansasynda saýda ornyn ashýǵa ruqsat bergeni úshin ózinen 200 AQSh dollary kóleminde para alǵany týraly shaǵym túsirdi. Shuǵyl izdestirý sharalaryn júrgizý barysynda departament qyzmetkerleri J. Ótegenovti para alǵanyna bultartpaıtyn aıǵaqtarmen ustap, oǵan qatysty Qylmystyq kodekstiń 311 baby, 2-bólimi boıynsha para alǵany úshin is qozǵady. Bul materıal gazette «Paraqordy quryqtaýǵa kómektesip, syılyq aldy» degen taqyryppen berilgen.
***
«Sizdiń qunyńyz qansha? Adam retinde baǵańyz nemen ólshenedi? Adam úshin eń qymbatty ne nárse? Kez kelgen adam úshin eń birinshi - onyń aty qymbat. Ákesiniń aty qymbat. Atasynyń aty qymbat. Tegi qymbat, tuqymy qymbat. Aty-jónińizde qate joq bolsa, siz óz qunyńyzdy, óz baǵańyzdy bilesiz. Aty-jónińizde qaptaǵan qate bolsa she? Onda óz qunyńyzdy ózińiz shyǵararsyz. Qazaqtyń quny qansha deýimizde mán bar. Jaqynda «Egemen» men «Kazpravdaǵa» bıylǵy Biryńǵaı ulttyq testileýdiń qorytyndysy shyǵady. Mektep bitirip, joǵary oqý ornyna túsýshi túlekterdiń aty-jónindegi qateden aıaq alyp júre almaısyz. Qazaqta qansha qunsyz qazaqtyń bar ekenin sol tizimge qarap-aq jobalaı berýge bolady. Aty-jóndi qate jazý jaǵynan aldymyzǵa qara salmaı kelemiz. Bir qyzyǵy, soǵan esh qorlanbaımyz da, namystanbaımyz da! Qateni túzetkisi kelgen adam myń esikti ashýyna týra keledi. Tabanynan tozady. Sharshaıdy. Shaldyǵady. Aqyr sońynda bárine qolyn bir siltep, qoıa salady»,-dep jazady «Aıqyn» basylymy «Qazaqtyń quny qansha?» degen maqalada. Osy kúni atyna «mıagkıı znak» qosylyp jazylmaǵan qazaqtyń qyzy az. Gýlmıra, Gýljan, Gýlnar, Gýljanar, Gýljamal, Gýlsım dep aty gúlge bitken qyzdyń bári derlik qate atty kóterip júr. Anar - Anara, Manar - Manara, Janar - Janara degen orys tiliniń yńǵaıymen jatyp turatyn attardy esepke alsańyz, eriksiz tilińizdi tisteısiz.
Osy basylymda «Mınıstrler qaıda ketti?» atty maqala kópshilik nazaryna usynylyp otyr. «Ótken jyly Elbasy Nursultan Nazarbaev memlekettik qyzmetkerlerge jańajyldyq jáne basqa da memlekettik merekelerdi shetelde qarsy alýǵa tyıym salǵan edi. Elbasymyzdyń eskertýi qazaqstandyq saıası elıtanyń shymbaıyna qatty batyp ketken tárizdi. Shilde aıynyń alǵashqy onkúndiginde BAQ betterinde «Elbasymyz qysqa merzimdi eńbek demalysyna shyqty» degen aqparat jarııalanǵan kúnnen bastap demalys alyp, shetel asyp ketetin qazaqstandyq saıası elıta bıyl eńbek demalysyna shyǵýǵa asyǵar emes»,-dep jazady gazet. Úkimettiń baspasóz bólimi mınıstrlerdiń basym kópshiligi qazir jumys ornynda ekenin aıtady. Ótken aptanyń aıaǵynda Premer-mınıstrdiń orynbasary Erbol Orynbaev Qaraǵandy oblysynda jańadan ashylyp jatqan jumys oryndarymen tanysty. Aıtpaqshy, osy aımaqta Elbasymyzdyń keńesshisi Gúlshara Ábdihalyqova, Densaýlyq saqtaý mınıstri Salıdat Qaıyrbekova da Qaraǵandy oblysynyń shetkeri aımaqtarynda issaparda júr degen aqparat aldyq. Tipti maýsymnyń aıaǵynda eńbek jazǵy demalysqa shyqqan senatorlar men májilismenderdiń aımaqtardaǵy kezdesýleri jaıly aqparattar basylym betterinde jıi jarııalanyp júr. Mysaly, senator Erlan Nyǵmatýllın ótken aptada tvıtterdegi jeke paraqshasynda «Ázirge demalystyń aýyly alys bolyp tur. Otbasymdy shetelge jiberdim. Ózim, qolym qalt etse, Alakólge baryp qaıtatyn shyǵarmyn» dep jazdy. Májilismender Rozaqul Halmuradov pen Qamal Burhanov eldiń ortasy eshbir demalys ornyn almastyra almaıtynyn aıtty. Májilismen Rozaqul Halmuradov aldaǵy on kúnde respýblıkaǵa belgili «Saryaǵash» shıpaıjaıyna baryp qalýy ábden múmkin. «Saryaǵashta» demalamyn» dep júrgen halyq qalaýlylarynyń qatarynda senator Qýanysh Aıtahanov pen májilismen Maıra Aısına da bar.
