Mınıstr ishki saýda-sattyqtyń negizgi úsh problemasyn atady

NUR-SULTAN. QazAqparat – Saýda jáne ıntegratsııa mınıstri Baqyt Sultanov Qazaqstannyń ishki saýda-sattyǵynyń negizgi úsh problemasyn atady, dep habarlaıdy QazAqparat tilshisi.

«Máselen, ishki saýdada búgingi kúni úsh túıindi problema bar. Bul salanyń tıimdi damýyna kedergi keltiretin 3 tapshylyq: birinshisi - zamanaýı saýda formattarynyń azdyǵy, ekinshisi - saýda alańdarynyń jetispeýshiligi, úshinshisi - tıimdi qoıma oryndarynyń shekteýligi. Osy problemalar deldaldardyń qyrýar jáne kúńgirt jelisiniń qalyptasýyna alyp keledi», - dedi mınıstr Úkimet otyrysynda.

Mınıstrdiń aıtýynsha bul problemalar taýardy óndirýshiden tutynýshyǵa deıin ońtaıly tizbek boıynsha jetkizýge múmkindik bermeıdi.

«Osynyń saldarynan búgin de biz azyq-túlik baǵasynyń negizsiz ósip otyrǵanyn jáne halyqtyń olardy satyp alýǵa aıtarlyqtaı shyǵyn jumsaıtynyn baıqaımyz», - dedi ol.

Eske sala ketsek búgin Úkimet saýdany damytýdyń memlekettik baǵdarlamasynyń 2021-2025 jyldarǵa arnalǵan tujyrymdamasyn bekitken bolatyn.