Microsoft kompanııasy paıdalanýshylardy Internet Explorer braýzerinen bas tartýǵa shaqyrdy

NUR-SULTAN. QazAqparat – Microsoft korporatsııasy Windows paıdalanýshylaryn Edge braýzerine kóshe bastaýǵa shaqyrdy. Bul týraly kompanııanyń blogynda habarlandy.

Korporatsııa ókilderi qoldanýshylarǵa eskirgen braýzerdi qoldaý sharalary jaqyn arada aıaqtalatynyn eskertti. Microsoft ınjenerleri, ásirese ІT kompanııalarǵa úırenshikti braýzerden jańasyna aýysý qıyn bolýy múmkin ekenin atap ótti.

Birinshi kezekte Microsoft korporatsııasy Edge-te Internet Explorer-di iske qosýǵa múmkindik beretin arnaıy rejım bar ekenin alǵa tartqan. Materıal avtorlary paıdalanýshylarǵa belgili bir saıttardyń bul baǵdarlamamen qalaı ashylatynyn tekserýdi, al ınjenerler eski braýzerden birkelki ótý jáne jańa baǵdarlamany paıdalanýdy bastaý úshin arnaıy kúndi josparlaýǵa keńes berdi.

Sarapshylardyń aıtýynsha, Internet Explorer-den Edge-ge barlyq derekter men parametrlerdi tasymaldaý asa mańyzdy. Ol úshin Edge mekenjaı jolaǵyna «edge://settings/importData» pármenin engizip, «Importtaýdan...» batyrmasyn basyp, «Microsoft Internet Explorer» optsııasyn tańdaý kerek.

Microsoft ókilderi 2022 jyldyń 15 maýsymynda Internet Explorer-ge qoldaý kórsetý toqtatylatynyn eske saldy. Endi kompıýterine IE ornatqysy keletin paıdalanýshylar Edge braýzeriniń paraqshasyna baǵyttalady.