Meta Aýstralııada jarty mıllıonnan astam akkaýntty buǵattady

ASTANA. KAZINFORM – Meta kompanııasy 16 jasqa tolmaǵandardyń áleýmettik jelilerdi paıdalanýyna tyıym salý týraly zańǵa sáıkes Facebook pen Instagram-nan 500 myńnan astam aýstralııalyq balanyń akkaýnttaryn óshirdi, dep habarlaıdy Kazinform. 

ABC habarlaýynsha, 4-11 jeltoqsan aralyǵynda Instagram-nan 330 myń, Facebook-ten 173 myń jáne Thread-tan 39 myń paıdalanýshy joıyldy. Buǵan 2025 jyldyń 10 jeltoqsanynda kúshine engen 16 jasqa tolmaǵan balalarǵa áleýmettik jelilerdi paıdalanýǵa tyıym salatyn zań sebep boldy. 

Amerıkalyq kompanııa paıdalanýshylardyń jasyn rastaý úshin qoldanylatyn «júıesiz» tekserý ádisterin synǵa alyp, atalǵan zańnamanyń maqsattaryna qatysty synı eskertýlerin qaıta qaperge saldy. 

Óz kezeginde Meta kompanııasy Aýstralııa zańdaryn saqtaýdy jalǵastyrsa da, federaldyq úkimettiń ónerkásippen basqa ádispen ózara árekettesýin qalaıtynyn málimdedi. 

Eske sala ketsek, Aýstralııa jasóspirimderdiń áleýmettik jelini qoldanýyna alǵashqy bolyp tyıym saldy. 

Jańa zańǵa sáıkes, eń iri on platformaǵa balalarǵa túngi saǵat 12-den bastap qoljetimdilikti bloktaý mindetteldi, áıtpese olar 49,5 mln aýstralııalyq dollarǵa deıin (shamamen 33 mln AQSh dollary) aıyppul tóleýi múmkin. 

Buǵan deıin EO 16 jasqa deıingi balalarǵa áleýmettik jelilerdi shekteý týraly rezolıýtsııa qabyldaǵanyn jazǵan edik.