Merekelik tartý: Qosshy qalasynda 20 otbasy baspanaly boldy
KÓKShETAÝ. KAZINFORM - Astana kúnine baılanysty Qosshyda 20 otbasyna páter kilti tabys etildi.
Aqmola oblysy ákimdigi baspasóz qyzmetiniń málimetinshe, óńirde halyqty baspanamen qamtamasyz etý boıynsha belsendi jumystar júrgizilýde. Oblys ortalyǵy men Zerendi aýdanyndaǵy otbasylar jaıly úılerden páterli boldy. Qosshy qalasynda halyqtyń áleýmettik toptarynan shyqqan 20 otbasy – UOS ardagerine, kóp balaly analar men ata-anasynyń qamqorlyǵynsyz qalǵan jastarǵa «Dream Park» turǵyn úı kesheninen jańa páterdiń kilti tabys etildi.
Qýanysh ıelerin Aqmola oblysynyń ákimi Marat Ahmetjanov quttyqtady.
«Búgingi is-shara Memleket basshysynyń qazaqstandyqtardyń ómir súrý sapasyn arttyrýǵa baǵyttalǵan saıasatynyń aıqyn kórsetkishi jáne naqty júzege asyrylýynyń kórnisi. Óz shańyrǵaǵyńda ómir súrý - ár otbasy úshin úlken mereke. Óńirde jańa turǵyn úılerdiń qurylysy qarqyn alýda. Tek sońǵy jyldary oblysta turǵyn úı qurylysyna 200 mıllıard teńgeden astam ınvestıtsııa tartylyp, 2 mıllıon sharshy metrge jýyq turǵyn úı paıdalanýǵa berildi. Nátıjesinde, shamamen 12 myń aqmolalyq otbasy baspana máselesin sheshe aldy», - dedi oblys ákimi.
Páter alǵandardyń qatarynda Qosshy qalasynyń jas turǵyndary Maksım Mýshtaenko pen Vladımır Glazkov bar.
«Men óz nemerelerimniń qamqorshysymyn. Biz búgingi qýanyshty uzaq kúttik. Memleket basshysyna azamattar úshin qolaıly jaǵdaılar jasap, baspana máselesin sheship, qamqorlyq tanytyp jatqanyna alǵysymdy bildiremin»- deıdi Maksımniń atasy Leonıd Mýshtaenko.
Aıta ketsek, Qosshy qala mártebesin alǵannan beri 267 myń sharshy metrden astam turǵyn úı paıdalanýǵa berilip, 2384 otbasy baspanamen qamtyldy.
Oblys ákiminiń tapsyrmasy boıynsha jyl sońyna deıin Qosshy qalasynan taǵy 100-ge jýyq páterdi azamattarǵa satyp alý josparlanýda. Bul shara kóp balaly otbasylardyń, jetimderdiń, múgedekterdiń jáne basqa da áleýmettik mańyzy bar sanattaǵy turǵyndardyń turmys jaǵdaıyn jaqsartýǵa múmkindik bermekshi.
Eske salaıyq, sý tasqynynan zardap shekken Makınsk qalasynyń turǵyndary baspanaly boldy.
