Mereke kúnderi astanalyq avtobýstar kúsheıtilgen tártipte jumys isteıdi

ASTANA. QazAqparat - Mereke kúnderi qoǵamdyq kóliktiń kóp qoldanylatyn baǵdarlary kúsheıtilgen tártipte jumys isteıdi. Avtobýstardyń ıntervaly 15-ten 10 mınýtqa deıin azaıady, dep habarlaıdy QazAqparat Astana qalasy ákimdiginiń resmı saıtyna silteme jasap.

«Bıyl qazaqstandyqtar Táýelsizdik kúnine oraı 4 kún demalady. Elorda turǵyndary oıyn-saýyq oryndaryna qatynaýy úshin qalalyq qoǵamdyq kóliktiń 20-dan astam baǵdary kúsheıtilgen tártipte jumys istemek. Avtobýstardyń sany kóbeıedi. Atalǵan baǵdarlarda ınterval 15-ten 10 mınýtqa deıin azaıady», - dep málimdedi «Astana LRT» JShS baspasóz qyzmeti.

Osylaısha, qysqartylǵan ıntervalmen kelesi qalalyq baǵdarlar qatynaıtyn bolady: № 2, 3, 4, 7, 8, 10, 12, 17, 18, 19, 22, 24, 33, 37, 39, 40, 47, 48, 51 , 70, 71.