Memlekettik organdardyń baılanys ortalyqtary biryńǵaı tsıfrlyq platformaǵa biriktiriledi

Aqordada Erlan Qarınniń tóraǵalyǵymen ishki saıasat máseleleri jóninde respýblıkalyq keńes ótti. Jıynǵa Prezıdent Ákimshiligi qurylymdyq bólimsheleriniń basshylary, Úkimet músheleri, óńir ákimderiniń orynbasarlary jáne ishki saıasat basqarmalarynyń basshylary qatysty.

Vıtse-prezıdent ıdeologııalyq kún tártibin qalyptastyratyn konstıtýtsııalyq qundylyqtarǵa keńinen toqtaldy.

– Konstıtýtsııamyz memlekettiń quqyqtyq negizin ǵana emes, sonymen qatar qoǵamdaǵy irgeli qundylyqtardy da aıqyndaıdy. Osylaısha, tarıhymyzda tuńǵysh ret el ıdeologııasynyń baǵyt-baǵdary naqtylanyp, mazmundyq turǵydan tolyqty. Sondyqtan bizdiń eń basty mindetimiz – konstıtýtsııalyq qundylyqtardy túsindirý jáne nasıhattaý, – dedi Erlan Qarın.

Osy oraıda Vıtse-Prezıdent progressıvti konstıtýtsııalyq qundylyqtardy odan ári ilgeriletip, qoǵamdyq sanada ornyqtyrý qajet ekenin atap ótti.

– Memleket basshysynyń saıasaty Qazaqstandy odan ári órkendetýge baǵyttalǵan. Elimizde eleýli ózgerister bolyp jatyr. Qoǵamdyq ómirdiń barlyq salasy jańǵyryp jatyr. Sondyqtan halyq arasynda eńbekqorlyq, bilim, ǵylym jáne progress sekildi jasampaz qundylyqtardy dáripteý óte mańyzdy. Sonymen qatar eskilikti, toǵysharlyqty, radıkalızmdi nasıhattaıtyn kez kelgen áreketke qatań tosqaýyl qoıý kerek. Kópshilik ortada aragidik ushyrasatyn túrli shekten tys áreketter men mádenıetsizdikke adamdardyń ózi qarsy ekenin kórip júrmiz. Bul qoǵam mádenıeti men qundylyqtardyń ózgere bastaǵanyn bildiredi. Demek Prezıdenttiń progressıvti reformalary jurtshylyq tarapynan keńinen qoldaý tapty ári bul buljymas sıpatqa ıe boldy, – dedi Erlan Qarın.

Vıtse-Prezıdenttiń paıymdaýynsha, ishki saıasattyń basym baǵyttarynyń biri – Memleket basshysynyń tapsyrmalary men bastamalaryn sapaly iske asyrý.

– Prezıdent Qasym-Jomart Toqaev óz Joldaýynda Memlekettik basqarý júıesin reformalaýdyń keshendi josparyn ázirleýdi tapsyrdy. Tsıfrlandyrý men jasandy ıntellektini qoldanýǵa negizdelgen jańa ekonomıkaǵa saı memlekettik basqarý modelin qalyptastyrý qajet. Sondyqtan memlekettiń servıstik modeliniń tetikterin, atap aıtqanda, halyqpen keri baılanys ornatýǵa arnalǵan aqparattyq júıelerdi jetildirý isin jedeldetken jón. Ortalyq memlekettik organdar men óńirlerdiń barlyq baılanys ortalyqtaryn biryńǵaı tsıfrlyq platformaǵa biriktirý mańyzdy mindetke aınalyp otyr, – dedi Erlan Qarın.

Keńes barysynda etnosaralyq jáne konfessııaaralyq kelisimdi nyǵaıtý, qoǵamdyq birlestiktermen jáne sarapshylarmen yqpaldastyq máseleleri, sondaı-aq mádenı-gýmanıtarlyq, aqparattyq, otbasy jáne jastar saıasatyndaǵy basymdyqtar qaraldy.

Jıyn qorytyndysy boıynsha jaýapty memlekettik organdarǵa ishki saıasattyń negizgi baǵyttaryn júzege asyrý jóninde naqty tapsyrmalar berildi.

Aıta ketelik Erlan Qarın Prezıdent Joldaýyn iske asyrýdyń úsh negizgi mindetin ataǵan edi.