Erlan Qarın: Balalardyń qaýipsizdigi úshin zamanaýı tsıfrlyq sheshimderdi engizip jatyrmyz
ASTANA.KAZINFORM — Memlekettik keńesshi áleýmettik salaǵa tsıfrlyq quraldardy engizýdiń mańyzyn atap ótti. Bul týraly Aqordanyń baspasóz qyzmeti habarlady.
Memlekettik keńesshi Erlan Qarın men Bala quqyqtary jónindegi ýákil Dınara Zákıeva otbasy, áıel jáne bala quqyqtaryn qorǵaý máseleleri boıynsha jumys isteıtin biryńǵaı «111» baılanys ortalyǵynyń qyzmetimen tanysty
Balalardyń qaýipsizdigin qamtamasyz etý jáne olardyń quqyqtaryn qorǵaýdyń ózekti máselelerin talqylaý barysynda Erlan Qarın salaǵa jańa tsıfrlyq quraldardy engizý qajet ekenin atap ótti.
Memlekettik keńesshi áleýmettik saladaǵy naqty mindetterdi iske asyrý kezinde tsıfrlyq tehnologııalarǵa negizdelgen qarapaıym smart-sheshimder keńinen qoldanyla bastaǵanyn aıtty.
– Balalardyń quqyqtaryn qorǵaý jáne olardyń qaýipsizdigin qamtamasyz etý salasynda mektepterge dástúrli telefon qońyraýlaryna zamanaýı balama retinde QR-kodtardy ornalastyra bastadyq. Jańa tásil myńdaǵan balaǵa bilikti psıhologııalyq kómektiń ýaqtyly kórsetilýine, al jekelegen jaǵdaılarda qaıǵyly jaǵdaılardyń aldyn alýǵa múmkindik berdi, – dedi Erlan Qarın.
Sondaı-aq azamattardyń E-otinish jáne E-gov tsıfrlyq platformalary arqyly joldaǵan ótinishterin taldaý jumysy belsendi qoldanyla bastady. Halyqtyń naqty suranysyn saralaý negizinde memlekettik organdar azamattardyń múddesine saı júıeli sheshimder qabyldap jatyr.
– Tsıfrlyq tehnologııalarǵa negizdelgen jańa tásilderdiń barlyǵy óz nátıjesin berip, memleket qabyldaıtyn sheshimderdiń tıimdiligi men jedeldigin arttyrýda. Sondyqtan qoǵamdyq kommýnıkatsııalar salasynda tsıfrlyq quraldardy barynsha belsendi engizý qajet, – dedi Memlekettik keńesshi.
Aıta ketelik Dınara Zakıeva balalardy qorǵaý salasyndaǵy eń mańyzdy oqıǵa – Bala quqyǵyn qorǵaý basqarmalarynyń qurylýy ekenin aıtqan edi.
