Qazaq eli túbegeıli tarıhı tańdaýyn jasady — Memleket basshysy

ASTANA. KAZINFORM — Prezıdent Qasym-Jomart Toqaev respýblıkalyq referendým barysynda júrgizilgen ekzıt-poll qorytyndysymen tanysty. Bul týraly Aqordanyń baspasóz qyzmeti habarlady.

«Qazmedıa ortalyǵynyń» stýdııasynda ekzıt-poll nátıjeleri tanystyrylǵannan keıin Memleket basshysy málimdeme jasady.

— Búgin — Qazaqstan úshin tarıhı kún! Elimizdiń azamattary konstıtýtsııalyq reformany qoldap, referendýmǵa belsendi túrde qatysty. Otanymyzdyń bolashaǵyn oılap daýys berdi. Bul — óte jaqsy oqıǵa. Qazir ǵana ekzıt-polldyń nátıjeleri shyqty. Soǵan sáıkes qazaq eli túbegeıli tarıhı tańdaýyn jasady. Halqymyzǵa shynaıy rızashylyǵymdy aıtqym keledi. Búgin jurtymyz daýys berip, Qazaqstannyń tarıhyn, taǵdyryn aıqyndady. Bul sheshim dúnıe júzi tarıhynda máńgi saqtalady. Bul másele boıynsha eshqandaı kúmánim joq. Óıtkeni bul — azamattarymyzdyń boıyndaǵy naǵyz otanshyldyq nyshany. Endi jyl saıyn 15 naýryzdy — Konstıtýtsııa kúni, ıaǵnı, elimizdiń eń basty merekesiniń biri retinde qarsy alamyz. Sebebi Qazaqstan halqy jańarý men jańǵyrý úshin daýys berdi. Bul — bizdiń bárimizge ortaq jetistik. Barshańyzdy shyn júrekten quttyqtaımyn! — dedi Memleket basshysy.

Aıta keteıik, Qasym-Jomart Toqaev «Qazmedıa» ortalyǵynda respýblıkalyq referendým aıasyndaǵy úgit-nasıhat naýqanyna belsendi qatysqan jastarmen kezdesti.