Medıtsınany qarjylandyrý kózderiniń málimetteri biriktiriledi

ASTANA. KAZINFORM — Premer-mınıstrdiń orynbasary, Mádenıet jáne aqparat mınıstri Aıda Balaeva Úkimet otyrysynda jeke menshik mektepterdiń jumysy qalaı rettelip jatqanyn aıtty.

— Prezıdent tapsyrmasy boıynsha medıtsınalyq kómekti halyqtyń naqty qajettilikterine, demografııalyq jáne kóshi-qon derekterine súıene otyryp josparlaýǵa kóshemiz. Qarjylandyrý kólemi eń tıimdi memlekettik jáne senimdi jeke emhanalarǵa baǵyttalady. Qosarlanǵan tólem men jalǵan esepti boldyrmaý úshin biryńǵaı tsıfrlyq baqylaý engizilmek. Qosarlanǵan tólemder salystyrylyp, barlyq qarjylandyrý kóziniń málimetteri biriktiriledi. Patsıenttermen keri baılanys mobıldi qosymsha arqyly júzege asady, — dedi vıtse-premer.

Sondaı-aq, ol medıtsınalyq qyzmet sapasyn baqylaý kúsheıip, lıtsenzııalaý talaptary qatańdaıtynyn aıtty.

— Mindetti áleýmettik medıtsınalyq saqtandyrý júıesi Qarjy mınıstrligine berildi. Qazir quqyq qorǵaý organdarymen birlesip «Zań jáne tártip» qaǵıdatyna sáıkes tekserý júrip jatyr. Sonymen qatar, jeke medıtsına jáne bilim berý uıymdaryn qarjylandyrý mehanızmderin qaıta qaraý boıynsha is-sharalar jospary bekitildi. Osy sharalardy iske asyrý arqyly ashyq ári nátıjege baǵdarlanǵan júıe qalyptasady. Jalpy biz densaýlyq saqtaý jáne bilim berý salasynda kórsetiletin qyzmetterdiń sapasyna qatań baqylaý ornatýǵa tıispiz. Óıtkeni halyqtyń ómir súrý sapasy atalǵan máselelerge tikeleı baılanysty, — dedi Aıda Balaeva.

Eske salsaq, keshegi Ulttyq quryltaı otyrysynda Prezıdent Qasym-Jomart Toqaev medıtsınalyq saqtandyrý qorynan orasan zor qarajat urlanyp jatqanyn aıtqan edi.