Medeýdi sharpyǵan órt qashan tolyq sónedi
ALMATY. QazAqparat - Almaty qalasynyń tótenshe jaǵdaılar departamenti basshysynyń mindetin ýaqytsha atqarýshy Samat Asaınov Medeýdegi órt qashan tolyq aýyzdyqtalatynyn aıtty, dep habarlaıdy QazAqparat tilshisi.
Aıtýynsha, órt 8 mamyr kúni saǵat 17:53-te oqshaýlanǵan.
Qazir qutqarýshylar aǵashtardyń órtengen qaldyqtary men tamyrlardy aralaýmen aınalysyp jatyr.
«Búgin biz Іle Alataýy ulttyq parkiniń basshylyǵymen sóılestik. Meniń oıymsha, órt tolyq jumys kúniniń sońyna deıin nemese erteń sónedi dep oılaımyn. Olar erteń bul aýmaqta qaıta órt bolmaıtynyna tolyq senimdi bolǵan kezde jalyn aýyzdyqtalǵanyn habarlaıdy», – dedi Samat Asaınov.
Órt sóndirý jumysyna Іle Alataýy ulttyq parkiniń 35 qyzmetkeri, Qazseldenqorǵaý mekemesiniń 15 mamany, sondaı-aq TJD tórt qyzmetkeri jumyldyryldy.
Buǵan deıin ol alapat órttiń shyǵýyna adam faktory sebep bolýy múmkin ekenin aıtqan edi.
Eske salaıyq, 7 mamyr túngi saǵat 23.00 shamasynda Іle Alataýy memlekettik ulttyq tabıǵı parki Kishi Almaty ormanshylyǵy 33-aýmaǵynan órt shyqqan bolatyn.
Jalynmen kúreske órt sóndirýshiler, birneshe tehnıka men tikushaq jumyldyrylǵan.
Tutanǵan otpen kúres kezinde órt sóndirýshi Arslan Qurmanbekov mert boldy.
Keıin Almaty qalalyq tótenshe jaǵdaılar departamenti qaza tapqan qyzmetker Arslan Qurmanbekovtiń otbasyna 13 mln teńge ótemaqy beriletinin aıtty.
