Májilis erekshe qorǵalatyn tabıǵı aýmaqtarǵa qatysty zańdy qabyldady
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtardy paıdalanǵany úshin tólem alý tártibin jetildirý máseleleri boıynsha ózgerister men tolyqtyrý engizý týraly» zańy men ilispe qujat ekinshi oqylymda qaralyp, qabyldandy.
Zańdar erekshe qorǵalatyn tabıǵı aýmaqtardy paıdalaný salasyndaǵy zańnamany odan ári jetildirýge baǵyttalǵan.
Búgin Májilistiń jalpy otyrysynda talǵan qujattar birinshi oqylymda maquldanǵan edi.
Májilis depýtaty Murat Ergeshbaevtyń aıtýynsha, bul zańdar boıynsha múddeli memlekettik organdardyń, kásipkerler palatasy ókilderiniń qatysýymen jumys tobynyń 4 otyrysy jáne Qarjy jáne bıýdjet komıtetiniń keńeıtilgen otyrysy ótkizildi.
Depýtattar zańdarǵa mynadaı túzetýler engizdi:
— Orman kodeksine, «Erekshe qorǵalatyn tabıǵı aýmaqtar týraly» jáne «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» qoldanystaǵy zańdarynyń keıbir normalary zań jobalarynyń normalaryna sáıkes keltirildi;
— «Lotereıalar jáne lotereıa qyzmeti týraly» Zańyna «elektrondyq lotereıa bıleti» uǵymynyń engizilýine baılanysty, Salyq Kodeksiniń 381- babynyń redaktsııasy naqtylandy;
— turmystyq aspaptardy nemese turmystyq elektrotehnıka quraldaryn, sondaı-aq, olardyń komponentterin ótkizetin ózge de tulǵalardy, ıaǵnı dıstrıbıýtorlardy qosylǵan qun salyǵyn tóleýden bosatý bóliginde ózgerister engizildi.
«Qoldanystaǵy Salyq kodeksine sáıkes, atalǵan taýarlar Qazaqstanda óndirligen jaǵdaıda onyń óndirýshileri men dılerleri qosylǵan qun salyǵynan bosatylǵan bolatyn. Buǵan qosa, zań jobalarynyń jekelegen normalary „Quqyqtyq aktiler týraly“ zańynyń normalaryna sáıkes keltirilip, depýtattar engizgen qosymsha túzetýlerdi eskere otyryp, jobalardyń ataýlary da ózgertildi. Parlament Májilisiniń barlyq turaqty komıtetteri zańdarǵa oń qorytyndylaryn berdi. Joǵaryda baıandalǵandardy eskere otyryp, Qarjy jáne bıýdjet komıteti atalǵan zańdardy qabyldaýdy jáne olardy Parlament Senatyna jiberýdi usynady», — dedi depýtat.
Májilis depýtattary atalǵan qujattardy qabyldap, Senat qaraýyna joldady.
