Maıdan medbıkesi Anna Kotova 102 jasqa toldy
ASTANA. KAZINFORM — Qaraǵandy oblysy Osakarov aýdany qorǵanys isteri jónindegi bóliminiń áskerı qyzmetshileri Uly Otan soǵysynyń ardageri, maıdan medbıkesi Anna Nıkanorovna Kotovany 102 jasqa tolýymen quttyqtady, dep habarlaıdy Qorǵanys mınıstrliginiń baspasóz qyzmeti.
Ardagerge Qorǵanys mınıstriniń atynan quttyqtaý hat, gúl shoqtary men estelik syılyqtar tabystaldy. Qorǵanys vedomstvosynyń ókilderi onyń erligi, jaýyngerlerge kórsetken janqııarlyq kómegi men talaı adamnyń ómirin saqtap qalǵany úshin rızashylyqtaryn bildirdi.
Osakarov aýdany qorǵanys isteri jónindegi bólim bastyǵynyń mindetin ýaqytsha atqarýshy aǵa leıtenant Ádil Jamalov Anna Nıkanorovnanyń ómir jolyn erlik pen meıirimniń, Otanǵa adal qyzmet etýdiń jarqyn úlgisi dep atap ótti.
Anna Kotova Voronej oblysynda dúnıege kelgen. 1943 jyly 2-shi Ýkraına maıdanynyń 65-shi evakýatsııalyq gospıtaline jiberilip, jaralanǵan jaýyngerlerge kómek kórsetti. Jas medbıke aýyr jaǵdaıda qyzmet atqaryp, dárigerlerge operatsııa kezinde járdemdesti, jaralylardy kútti.
Maıdandaǵy erligi úshin Anna Kotova II dárejeli Otan soǵysy ordenimen, «Uly Otan soǵysyndaǵy Germanııany jeńgeni úshin» medalimen, «Sanıtarlyq qyzmettiń úzdigi» belgisimen jáne ózge de marapattarmen nagradtalǵan.
Jeńis kúnin ol Vengrııada qarsy alyp, 1946 jyly Qazaqstanǵa qonys aýdardy. Zeınetke shyqqanǵa deıin Qaraǵandy oblysy Osakarov aýdanyndaǵy densaýlyq saqtaý mekemelerinde eńbek etti.
Otbasynda jubaıymen birge 50 jyldan astam ǵumyr keship, bir qyz tárbıelep ósirdi. Búginde Anna Nıkanorovnanyń tórt nemeresi men on shóberesi bar.
Budan buryn pavlodarlyq áskerıler ardagerdi ǵasyrlyq mereıtoıymen quttyqtaǵanyn jazǵanbyz.