Máýlen Áshimbaev Senat Bıýrosynyń otyrysyn ótkizdi
Otyrys barysynda Senat Tóraǵasy tótenshe jaǵdaı rejıminen keıin elimizde Memleket basshysynyń tapsyrmasy boıynsha ekonomıkany qalpyna keltirýdiń keshendi jospary iske asyrylatynyn atap ótti. Ony arnaıy memlekettik komıssııa ázirleıdi. Óz kezeginde, Joǵarǵy palata Prezıdenttiń ekonomıkany odan ári damytýǵa jáne halyqtyń ál-aýqatyn arttyrýǵa arnalǵan strategııasyn zańnamalyq turǵyda sapaly ári der kezinde qamtamasyz etýge tıis.
Sondaı-aq, Máýlen Áshimbaev Memleket basshysy daǵdarystan keıingi damýdyń birqatar basym baǵyttaryn anyqtap bergenine nazar aýdardy. Olardyń qatarynda densaýlyq saqtaý júıesin jetildirý, qazaqstandyqtardyń ómiri men densaýlyǵyn qorǵaý, bilim jáne ǵylym salasyn jańǵyrtý, adamı kapıtaldy damytý, shaǵyn jáne orta bıznesti órkendetý, ulttyq ekonomıkany ártaraptandyrý máseleleri bar.
Senat Tóraǵasynyń aıtýynsha, depýtattar qazirgi kezeńde Prezıdenttiń barlyq bastamalaryna tıimdi ári ýaqytyly qoldaý kórsetýi kerek.
«Soǵan baılanysty biz óz josparymyzdy qaıta qarap, Memleket basshysynyń aıtqandaryn tolyq oryndaý úshin Senat jumysyn tıimdi uıymdastyrýymyz qajet», – dedi Máýlen Áshimbaev.
Otyrysta Májilis maquldaǵan zań jobalaryn komıtetter arasynda bólý máseleleri de qaraldy.
Halyqaralyq qatynastar, qorǵanys jáne qaýipsizdik komıteti elimizdiń keıbir zańnamalyq aktilerine tótenshe jaǵdaı máseleleri boıynsha, sondaı-aq soǵys jaǵdaıy máseleleri boıynsha túzetýler engizý týraly zań jobalary boıynsha bas komıtet bolyp belgilendi.
Ekonomıkalyq saıasat, ınnovatsııalyq damý jáne kásipkerlik jónindegi komıtetke elimizdiń keıbir zańnamalyq aktilerine lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly; tsıfrlyq tehnologııalardy retteý máseleleri, sondaı-aq tutynýshylardyń quqyqtaryn qorǵaý máseleleri týraly zań jobalaryna qorytyndy ázirleý tapsyryldy.
Konstıtýtsııalyq zańnama, sot júıesi jáne quqyq qorǵaý organdary komıteti «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Qazaqstan Respýblıkasy Konstıtýtsııalyq zańynyń jobasy boıynsha, sondaı-aq «Qazaqstan Respýblıkasy Parlamentiniń komıtetteri men komıssııalary týraly» QR Zańyna parlamenttik oppozıtsııa máseleleri boıynsha ózgeris pen tolyqtyrýlar engizý týraly» zań jobasy boıynsha bas komıtet bolyp belgilendi. Sonymen qatar, bul komıtetke Ákimshilik rásimdik-protsestik kodeksiniń jobasy men zańnamaǵa atqarýshylyq is júrgizý jáne qylmystyq zańnamany jetildirý máseleleri týraly zań jobasy berildi.
Sonymen qatar Bıýroda Parlament Senatynyń 14 mamyrda ótetin otyrysynyń kún tártibi belgilendi. Soǵan sáıkes senatorlar «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» (ekinshi oqylym), «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrý engizý týraly» (ekinshi oqylym), «Qazaqstan Respýblıkasynyń keıbir zańnamalyq aktilerine tótenshe jaǵdaı máseleleri boıynsha ózgerister engizý týraly», «Qazaqstan Respýblıkasynyń keıbir zańnamalyq aktilerine jumyldyrý daıyndyǵy men jumyldyrý máseleleri boıynsha ózgerister men tolyqtyrýlar engizý týraly» (birinshi oqylym) jáne «Mamandandyrylǵan mekemelerdiń artyqshylyqtary men ımmýnıtetteri týraly konventsııany ratıfıkatsııalaý týraly» zań jobalaryn qaraıdy.