Shyǵys Qazaqstanda shekaradaǵy aýyl «qytaı ınternetin» paıdalanyp otyr
ÓSKEMEN. KAZINFORM — Shyǵys Qazaqstan oblysynda shekara shebinde ornalasqan Marqakól aýdany Bylǵary Tabyty aýylynda 60-qa jýyq adam turady. Biraq olar Qazaqstan jerinde «Qytaı ınternetin» paıdalanyp otyr.
«Jyldamdyǵy óte jaqsy»
Bylǵary Tabyty aýylyna aıaq bassańyz birden uıaly telefonyńyzǵa «Qytaıǵa qosh keldińiz!» degen habarlama keledi.
Bul týraly Parlament Májilisiniń depýtaty Erlan Saıyrov ta aıtqan edi. Biraq áli kúnge deıin másele sheshilmeı keledi.
— Qazir shekaralyq aýdandarda ınternet joq. Qytaıdyń uıaly baılanysy ǵana istep tur. Mine osyny qalypqa keltirý kerek. Ondaı aýdandardyń bárin Qazaqstannyń aqparattyq aımaǵyna qaıtadan engizý kerek, — dedi ol.
Bylǵary Tabyty aýylynyń turǵyndary «Bılaınnyń» arnaıy tarıfine qosylyp, solardyń ishinen qytaılyq operatordy tańdaıtynyn, sol arqyly ınternettiń «qyzyǵyn» kórip otyrǵanyn jetkizdi.
— Áıtpese bizde uıaly baılanys ta, ınternet te ustamaıdy. «Qytaı ınterneti» jaqsy boldy. Áleýmettik jelige kirip, WhatsApp arqyly qaladaǵy týǵan-týyspen habar almasyp otyrmyz. Jyldamdyǵy óte jaqsy, — deıdi aýyl halqy.
Ákimdik ne deıdi?
Osy máselege qatysty jergilikti bıliktiń jaýabyn bilý úshin Kazinform tilshisi Marqakól aýdanynyń ákimi Rústembek Kemeshevke saýalhat joldady.
— Bylǵary Tabyty aýylynda 56 adam turady. Sońǵy on jylda eldi mekennen 50 adam kóship ketken. Aýyldaǵy ınternet máselesinen habardarmyz. Daýystyq baılanys jáne mobıldi ınternetpen qamtamasyz etý jumysyn lıtsenzııalyq mindetteme sheńberinde iske asyrý josparlanyp otyr. Marqakól aýdany boıynsha byltyrdan beri 13 aýyldy, onyń ishinde 3 aýyldy — Aqbulaq, Aqjaılaý, Qaınarlyny uıaly baılanys operatorlarynyń qosymsha mindettemelerine qosý úshin, taǵy 10 aýyl — Jańaaýyl, Qazaqstan, Bylǵary Tabyty, Taqyr, Sheńgeldi, Qarashilik, Qaroı, Jıdeli, Igilikti «Vostoktelekom» JShS arqyly ınternetke qosý jaı-japsaryn talqylap jatyrmyz, — dep jaýap berdi aýdan ákimi.
2026 jyly Urunhaıka aýylynda respýblıkalyq bıýdjet esebinen talshyqty-optıkalyq baılanys jelileri («KarTel» JShS baılanys operatory), 285 adam turatyn Tósqaıyń aýylynda jergilikti atqarýshy organ esebinen antenna-machtalyq qurylym salynyp, iske qosylmaq.
— 2027 jyly 5 eldi mekendi (Teriskeı-Bókenbaı — 62 adam, Balyqtybulaq — 45 adam, Buǵy Múıiz — 63 adam, Shaǵanaty — 71 adam, Kúngeı-Bókenbaı — 41 adam turady) respýblıkalyq bıýdjet esebinen ınternetpen qamtamasyz etý úshin talshyqty-optıkalyq baılanys jelileri júrgiziledi, — deıdi Rústembek Kemeshev.
Oblys ákimdiginiń málimetinshe, bıyl 60 aýylǵa ınternet tartylmaq.
Oblys boıynsha 2022 jyly 17 aýyl, 2023 jyly 20 aýyl, 2024 jyly 45 aýyl ınternetpen qamtamasyz etilgen. Bul baǵyttaǵy jumystar osy jyly da jalǵasady.
Sol úshin jergilikti atqarýshy organdar men baılanys operatorlary arasynda kelisimsharttar jasalyp jatyr.
— Altaı aýdanyna qarasty Feklıstovka aýylynda ınternet tartyldy. Halyqtyń aryz-shaǵymdarynan keıin aýyldy baılanyspen qamtý úshin 3 jáne 4G standartyna saı bazalyq stansa iske qosyldy. Onyń jyldamdyǵy 86,9 Mbıt/s-qa deıin jetedi. Baılanys operatory «Kar Tel» JShS óz qarajaty esebinen antenna-machtalyq qurylymdy ornatyp, elektr jelisin tartty. Sondaı-aq Tele2 jáne Kcell/Activ operatorlarynyń jelisin ortaq paıdalaný múmkindigi qarastyrylyp jatyr, — delingen aqparatta.
Eske salsaq, osyǵan deıin álem elderinde uıaly baılanys pen ınternet qansha turatynyn jazǵanbyz.