Mańǵystaýda jańa munaı ken orny ashyldy

AQTAÝ. QazAqparat - Mańǵystaý oblysyndaǵy Beıneý jáne Mańǵystaý aýdandarynyń aýmaǵynda ornalasqan Tepke ýchaskesinen TZ- birinshi barlaý uńǵymasynan munaı burqaǵy atqylady, dep habarlaıdy QazAqparat tilshisi Mańǵystaý oblysy ákiminiń baspasóz qyzmetine silteme jasap.

Alynǵan synamalar boıynsha munaı sapasy óte joǵary, jeńil, kúkirti joq.

Bul qýanyshty habardy oblys ákimi S.Trumovpen kezdesken Merıdıan Petroleým kompanııasynyń prezıdenti B. Qýandyqov jetkizdi. Onyń aıtýynsha, Tepkedegi ken orny - elimiz táýelsizdigin alǵaly 30 jylda Mańǵystaý oblysynda ashylǵan alǵashqy eń irisi bolmaq.

«2018 jyly bastalǵan geologııalyq barlaý jumysy nátıjesin berdi. Alynǵan munaıdyń qysymy, debıti, gazdyq faktory jáne basqa da parametrleri boıynsha iri ken orny bolady dep josparlap otyrmyz. Qazir kenornyndaǵy munaı qoryn anyqtaý jumystary júrip jatyr. Jańa kenishtiń aınalasynda «Qaraqudyq», «Arystan» jáne «Komsomolskoe» ken oryndary ornalasqan»,-dedi Merıdıan Petroleým kompanııasynyń prezıdenti B. Qýandyqov.

Jańa ken ornyna aty ańyzǵa aınalǵan geolog-barlaýshy, Mańǵystaýdaǵy barlyq kenishti ashýǵa atsalysqan Halel Ózbekqalıevtiń esimi berildi.