Mańǵystaýda maldardyń qutyrý deregi taǵy tirkeldi
AQTAÝ. QazAqparat - Óńirde taǵy 14 janýardyń qutyrý deregi tirkeldi. Tórt túlik maldyń ishinde túıe, jylqy, sıyr osy indetke shaldyqqan. Muny oblystyq veterınarııa basqarmasynyń mamandary rastap otyr, dep habarlaıdy QazAqparat.
Qutyrý dıagnozy respýblıkalyq veterınarlyq zerthanalarǵa jiberilgen 50 maldyń synamasynyń nátıjesinen keıin qoıyldy. Onyń 14-i teris nátıje kórsetken. Buǵan deıin veterınarlyq baqylaý jáne qadaǵalaý komıtetiniń mamandary vaktsına jasap, synamalardy Astanaǵa zertteýge jibergen bolatyn.
«Aýyrý tabylǵan mal ıelerine ótemaqy beriledi. Ótemaqy Aýyl sharýashylyǵy mınıstriniń № 559 buıryǵyna sáıkes belgilenedi. Ol úshin adamdar epızootııalyq otrıadqa tıisti qujattardy tapsyrýy tıis»,- dedi MO Veterınarııa basqarmasy epızootııalyq qaýipsizdik bóliminiń basshysy Qambar Momynov.
Juqpaly indetke shaldyqqan maldar Jańaózen qalasy men Munaıly, Qaraqııa jáne Mańǵystaý aýdandarynan tabylǵan. Qutyrý aýrýy úı janýarlaryna qasqyr, túlki, qarsaq sııaqty jyrtqysh ańdar tistegen kezde silekeıinen juqqan degen boljam bar. Sondyqtan qazirgi tańda aýdan, qala ákimdikteri tarapynan óz aýmaqtarynda jabaıy jyrtqysh ańdardyń sanyn anyqtaý jumystary da qolǵa alynǵan. Oǵan qosa oblys turǵyndaryna mal ustaý, baǵý jáne veterınarııalyq zańnamalarda kózdelgen tártipte óz mindetterin oryndaý týraly túsindirý jumystary júrgizilýde.
Eske sala keteıik, buǵan deıin Mańǵystaý oblysynda jan-janýardyń qutyrý aýrýy boıynsha 5 derek anyqtalǵandyǵy týraly habarlaǵan bolatynbyz.
