OPEK+ munaı óndirý kólemin táýligine 188 myń barrelge arttyrmaq
ASTANA. KAZINFORM — OPEC+ qatysýshylary munaı óndirý kvotalaryn kezekti ret arttyrý jóninde kelisimge keldi. Alaıda bul sheshimniń júzege asýy geosaıası turaqsyzdyq pen jetkizý tizbegindegi irkilisterge baılanysty ázirge belgisiz kúıinde qalyp otyr, dep habarlaıdy Reuters.
Derekkózderdiń málimetinshe, OPEC+ maýsym aıynda munaı óndirýdiń maqsatty kólemin táýligine shamamen 188 myń barrelge ulǵaıtýǵa kelisken. Túpkilikti sheshim 3 mamyrda ótetin aldaǵy otyrysta qabyldanady dep kútilýde.
Talqylaýǵa jeti memleket qatysyp jatyr: Saýd Arabııasy, ırak, Kýveıt, Aljır, Qazaqstan, Reseı jáne Oman. Sonymen qatar qazirgi syrtqy faktorlarǵa baılanysty naqty óndiris kóleminiń ósýi shekteýli bolýy múmkin.
Derekkózder Parsy shyǵanaǵyndaǵy jaǵdaı turaqtalyp, Ormýz buǵazy arqyly keme qatynasy tolyq qalpyna kelgenge deıin bul sheshim negizinen sımvoldyq sıpatta qalýy yqtımal ekenin aıtady. Jetkizilimderdegi irkilister munaı naryǵyna qysym jasap otyr.
Buǵan deıin munaı baǵasy sońǵy tórt jyldaǵy eń joǵary deńgeıge — bir barrel úshin 125 dollardan joǵary kórsetkishke deıin kúrt óskeni habarlanǵan bolatyn. Sarapshylar aldaǵy aılarda avıatsııalyq otyn tapshylyǵy týyndaýy jáne jahandyq ınflıatsııanyń jedeldeýi múmkin ekenin eskertedi.
Uıym derekterine sáıkes, naýryz aıynda OPEC+ elderindegi naqty óndiris kólemi táýligine shamamen 35,06 mıllıon barrel bolǵan. Eń iri qysqartýlar Saýd Arabııasy men Irak úlesine tıesili. Reseı de ınfraqurylymnyń zaqymdanýyna baılanysty óndiristi azaıtqan.
Eske sala keteıik, BAÁ 2026 jylǵy 1 mamyrdan bastap OPEC jáne OPEC+ quramynan shyǵý týraly sheshim qabyldady.
El OPEC qataryna 1967 jyly Ábý-Dabı ámirligi arqyly qosylǵan jáne 1971 jyly BAÁqurylǵannan keıin de músheligin saqtap kelgen.
Aıta ketelik Qazaqstan munaı óńdeýdi 39,2 mln tonnaǵa deıin arttyrýdy kózdeıdi.
