Mańǵystaýda kóktemgi sý tasqynyna qarsy sharalar pysyqtaldy
AQTAÝ. QazAqparat - Aqtaý qalasynyń jańbyr sýy jınalatyn 12 ýchaskesine drenajdyq júıe qurylysyn salýǵa jergilikti bıýdjetten 45 mln teńge bólingen. Qazir 10 ýchaskeniń qurylys jumystary aıaqtaldy. Bul týraly oblystyq TJD basshysy Qýanar Bazarbaev málim etti, dep habarlaıdy QazAqparat.
Kóktemgi sý tasqynynyń aldyn alý úshin óńirde arnaıy sharalar júzege asyrylyp jatyr. Bıyl tótenshelikter 308 tehnıka, 42 sý sorǵysh kóligin alǵan. Sondaı-aq, 10 qaıyq ta bar. Sonymen qatar, jeke quramnyń 575 qyzmetkeri men 112 tehnıka da saqadaı saı.
«Sý basý qaterleriniń aldyn alý jáne olardy joıý jónindegi 2017-2020 jyldarǵa arnalǵan is-sharalar kesheni» jol kartasyna Jańaózen qalasy men Munaıly aýdanynyń drenajdyq júıeleri qurylysyn salýǵa 2 joba engizildi», - deıdi oblystyq Tótenshe jaǵdaılar departamentiniń basshysy Qýanar Bazarbaev.
Qazirgi tańda Munaıly aýdanynyń keıbir kósheleri jańbyr jaýǵan soń sý basyp ketedi. Turǵyndar osy máselege qatysty kóp shaǵymdanady. Aıta keterligi, byltyr munda aryqtar qazylǵan bolatyn. Qazir sol kádege jarap tur. Al aldaǵy ýaqytta aýdanda drenaj júıesin salý qolǵa alynbaq.
«Atameken jáne Basqudyq aýyldarynda drenaj júıesin salý úshin jobalyq-smetalyq qujattar jasaldy. Eki jobanyń somasy 1,43 mlrd quraıdy. Oblys ákiminiń birinshi orynbasary Serik Qaleshuly (Amanǵalıev - avt.)Astanaǵa qajetti qujattardy jiberdi», - deıdi Munaıly aýdanynyń ákimi Nurlan Tájibaev.
