Mańǵystaýda «Adal jol» aktsııasy bastaldy
Marafondyq estafeta túrinde bastaý alǵan aktsııaǵa London men Rıo-de-Janeıro olımpıadalarynyń kúmis júldegeri Ádilbek Nııazymbetov, úkimettik emes uıym ókilderi men memlekettik qyzmetshiler, stýdentter men oqýshylar, etnomádenı ortalyqtarynyń ókilderi qatysty.
Mańǵystaýdyń maqtanyshy Ádilbek Nııazymbetovtyń aıtýynsha, «Otanǵa degen qurmet osyndaı ıgi sharalarǵa belsendilik tanytýdan bastalady. Sondyqtan jastar týǵan jerindegi adaldyqqa, aq jolǵa shaqyratyn ıgi bastamalarǵa jıi qatysý kerek. Elbasy árdaıym Qazaqstannyń bolashaǵy jastardyń qolynda dep keleshek urpaqqa senim artady. Elimizdiń bolashaǵy - bilimdi, adal, ultjandy azamattardyń qolynda».
Aldymen marafonshylar Aqtaý teńiz aılaǵynda katamaranǵa minip qalanyń qaq ortasyna deıin júzip keldi. Olardy oqýshylar men stýdentter, jergilikti atqarýshy bılik ókilderi men máslıhat depýtattary kútip aldy. Alańda jastardyń qatysýymen flesh-mob ótti.
«Mańǵystaý mártebeli ataǵymen, abyroıymen kópke úlgi bolatyn óńirlerdiń qatarynda. Sondyqtan osy adal joldy, taza joldy, sybaılas jemqorlyqqa tózbeıtin, sybaılas jemqorlyqqa jol bermeıtin, jastar men qoǵamnyń barlyq ókilderin osy ortaǵa jumyldyra shaqyra otyryp, Túpqaraǵan aýdanyna tabystaıtyn bolamyz»,- dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń MO departamentiniń basshysy Nurgúl Jannazarova.
Ári qaraı Mańǵystaý belsendileri aktsııanyń jalaýy men elimizdiń kók baıraǵyn kóterip, Aqtaý qalasyn aınalyp ótti. Olar estafetany Túpqaraǵan aýdanynyń turǵyndaryna tabystady. Aqshuqyr aýylynda marafonshylardy aýyl turǵyndary qushaq jaıa qarsy aldy. Jas ónerpazdar kúıden shashý shashyp, aktsııa jalaýyn qabyldap aldy.
Jyl boıyna jalǵasatyn «Adal jol» aktsııasy aıasynda barlyq sala qyzmetkerlerimen sybaılas jemqorlyqtyń aldyn alýǵa baǵyttalǵan ártúrli deńgeıdegi sharalar uıymdastyrý josparlanǵan. Túpqaraǵan aýdany aldaǵy ýaqytta estafetany ári qaraı oblystyń ózge aýdandary men qalalaryna joldaıdy. Respýblıka boıynsha júrip jatqan «Adal jol» aktsııasy «9 jeltoqsan - sybaılas jemqorlyqpen kúres kúni» elordada, al oblystyq deńgeıdegi sharalar Aqtaý qalasynda qorytyndylanady.
