Mańǵystaýda 500 jas jumyssyz júr
ASTANA. QazAqparat - Mańǵystaý oblysynda tirkegen jumyssyzdardyń 3,5%-y jastar, dep habarlaıdy QazAqparat. Óńirlik kommýnıkatsııalar qyzmetinde ótken baspasóz máslıhatynda oblys ákiminiń orynbasary Sholpan Іlmuhanbetova osylaı dep málimdedi.
Óńirde 14 myńnan astam jumyssyz turǵyn bar. Olardyń 500-ge jýyǵy jastar. Alaıda, jergilikti bılik bul kórsetkishti azaıtý úshin birqatar sharalardy qolǵa aldy.
Oblysta jyl basynan beri shamamen 31 myń jumys orny qurylyp, jumyssyzdyq deńgeıi 5,1%-dan, 4,9%-ǵa tómendegen. Al, jastar arasyndaǵy jumyssyzdyq 5%-dan, 3,5%-ǵa azaıǵan.
Jastardy qaıta oqytyp biliktiligin arttyrýǵa mán berilýde. «Jańa serpin» baǵdarlamasy boıynsha aımaqta 800 jas oqyp, kásiporynǵa jumysqa ornalassa, óndiristik tájirıbe boıynsha 173 jasqa joldama berilgen.
«Jańa serpin» boıynsha jastar «Kaspıı Tasjol», «Kaspıoplast», «Arcelormittal», «Ózenqurylysservıs», «Qazavtojol» kásiporyndaryna ornalasty. Al, óndiristik tájirıbege dánekerleýshi, esepshi, mashınıst, elektrık, baǵdarlamashy mamandyqtary boıynsha joldama berildi», - dedi Sholpan Іlmuhanbetova.
Endi bıyl 26 myń jańa jumys ornyn ashý josparlanǵan. Ásirese, qurylys, saýda, qyzmet kórsetý salasy men óńdeýshi ónerkásipke jastardy tartý qolǵa alynbaq.
Aıta keteıik, baspasóz máslıhatynda jumyssyzdar sanatynda ózin-ózi tabyspen qamtyǵandardyń da engenin aıtyldy. Olardyń qatarynda kóshe satýshylary da bar. Turaqty jumysy bolmasa da tabys tabady. Oblysta osyndaı 30 myńnan astam adam anyqtalǵan.
«Ózin-ózi qamtyǵan halyqtyń 80%-nyń únemi nemese toqsandyq kirisi bar ekenin anyqtaldy. Endi olardy jeke kásipker retinde salyq organdaryna tirkep, zańdastyrýdy bastaımyz. ıAǵnı, olar belgili bir mólsherde salyq tóleý kerek» - dedi Sholpan Іlmuhanbetova.
Sondaı-aq, sandyq tehnologııaǵa kóshken keıbir kásiporyndar jumysshylaryn qysqartýdy bastamaq. Al, Sholpan Іlmuhanbetovanyń aıtýynsha, mamandar jumyssyz qalmas úshin deńgeı-deńgeımen qysqartý týraly kelisim jasalǵan. Osy aralyqta olarǵa basqa salaǵa joldama berý josparlanǵan.
