Mańǵystaýdaǵy qaıǵyly jaǵdaı: Qarın memlekettik organdardyń jumysyn úılestirý jóninde keńes ótkizdi
ASTANA. KAZINFORM — Vıtse-prezıdent Erlan Qarın Mańǵystaý oblysyndaǵy qaıǵyly oqıǵaǵa baılanysty memlekettik deńgeıde qabyldanyp jatqan sheshimderdi iske asyrý sharalary, sondaı-aq aqparattyq-túsindirý jumystarynyń máseleleri talqylanǵan keńes ótkizdi.
— Mańǵystaýda bolǵan qaıǵyly jaǵdaıǵa baılanysty memlekettik deńgeıde qabyldanyp jatqan sharalar men sheshimderdi júzege asyrý, aqparattyq túsindirý jumystaryn júrgizý jáne basqa da mańyzdy máseleler talqylandy, — dedi ol.
Erlan Qarınniń málimetinshe memlekettik qurylymdar men qoǵamdyq uıymdardyń ózara úılesimdi jumysyn qamtamasyz etýge de basa nazar aýdaryldy.
Eske salaıyq, Kaspııdegi qaıǵyly oqıǵa 24 qyrkúıekte oqý-jaýyngerlik tapsyrmany oryndaý kezinde boldy. Aýa raıynyń kúrt nasharlap, jeldiń kúsheıýi saldarynan áskerı qyzmetshilerdi teńiz aǵyzyp áketti.
Buǵan deıin Memleket basshysy Qorǵanys mınıstrligindegi ahýaldy keshendi tekserý jónindegi komıssııa qurýdy tapsyrǵan bolatyn. Komıssııaǵa atqarylǵan jumystyń alǵashqy nátıjeleri týraly Prezıdentke jeti kún ishinde baıandaý tapsyryldy.
Búgin Prezıdent Dáýren Qosanovty Qazaqstannyń Qorǵanys mınıstri qyzmetinen bosatyp, bul laýazymǵa Aıdos Myrzahmetovti taǵaıyndady.
Aıta ketelik Prezıdent jańa mınıstrge áskerı basqarý júıesin jetildirýdi tapsyrǵan edi. Sonymen qatar Memleket basshysy sarbazdardyń qazasynan keıin áskerı basshylyqty qatań synǵa aldy.
