Mańǵystaýdaǵy qaıǵyly oqıǵadan keıin áskerde qandaı ózgerister bolady
ASTANA. KAZINFORM — Prezıdent Qasym-Jomart Toqaev armııa qaýipsizdigin kúsheıtý boıynsha birqatar sheshim qabyldady. Bul týraly vıtse-prezıdent Erlan Qarın málim etti.
Onyń sózinshe, Mańǵystaý oblysynda oqý-jattyǵý kezinde áskerı qyzmetshilerdiń qaza tabýy jalpyulttyq qasiretke aınaldy. Memleket basshysy osy oqıǵaǵa qatysty barlyq negizgi máseleni, ıaǵnı zardap shekkenderge kómek kórsetý, mundaı jaǵdaılardyń qaıtalanýyna jol bermes úshin oqıǵanyń mán-jaıyn jan-jaqty ári obektıvti tergeý jónindegi júıeli sharalardy jedel túrde jeke baqylaýyna aldy.
— Prezıdent Qasym-Jomart Toqaev Jalpyulttyq aza tutý kúnin jarııalap, qaıtys bolǵan áskerı qyzmetshilerdiń otbasylaryna kóńil aıtý jedelhattaryn joldap, olardyń týǵan-týystary men jaqyndaryna jeke óz atynan kóńil aıtty. Memleket basshysynyń Jarlyǵymen oqý-jattyǵý kezinde qaza tapqan 14 áskerı qyzmetshi «Aıbyn» ordenimen marapattaldy. Prezıdenttiń tapsyrmasymen Úkimettik komıssııa qurylyp, oqıǵa ornyna shuǵyl jiberildi. Memleket basshysy qaıtys bolǵan áskerı qyzmetshilerdiń otbasylary men zardap shekken jaýyngerlerge qajetti barlyq kómek pen qoldaýdy kórsetýdi tapsyrdy, — dep jazdy Erlan Qarın Telegram-daǵy paraqshasynda.
Vıtse-prezıdent atap ótkendeı, quqyq qorǵaý organdary qaıǵyly oqıǵanyń barlyq mán-jaıy men sebepterin anyqtaý úshin sotqa deıingi tergep-tekserýdi bastady.
— Alǵashqy kezektegi tergeý jáne protsessýaldyq is-áreketter júrgizildi. Qorǵanys mınıstrliginiń birqatar laýazymdy tulǵasy kúdikti retinde ustaldy. Qazirgi ýaqytta tergeý amaldary jalǵasyp jatyr jáne Bas Prokýratýra men Іshki ister mınıstrliginiń erekshe baqylaýynda, — dedi ol.
Erlan Qarınniń aıtýynsha, Qazaqstan Halyq Keńesiniń músheleri, Quryltaı depýtattary, saıası partııalardyń ókilderi, kásipkerler, metsenattar jáne basqa da azamattar qaza tapqan áskerı qyzmetshilerdiń otbasyna qoldaý kórsetýge daıyn ekenin bildirdi. Qysqa merzim ishinde qarajat jınaý isiniń jedel ári ashyq júrgizilýin qamtamasyz etetin arnaıy qor quryldy. Sondaı-aq Qazaqstan Halyq Keńesiniń múshesi Bekmurat Júsipov basqaratyn qoǵamdyq komıssııa jasaqtaldy. Komıssııanyń negizgi mindeti — jınalǵan qaıyrymdylyq qarajatyn ádil ári ashyq bólýdi qamtamasyz etý.
— Jurtshylyqtyń aldaǵy ýaqytta da qabyldanǵan barlyq shara týraly ýaqtyly ári ashyq aqparat alyp otyrýy qamtamasyz etiletin bolady. Eń bastysy memleket tek jedel áreket etip qana qoımaı, oqıǵalardyń túpki sebepterin joıýǵa baǵyttalǵan júıeli ári keshendi sheshimderdi qabyldaýda, — dedi vıtse-prezıdent.
Qarın Prezıdent Qorǵanys mınıstrliginiń jańa basshysyn taǵaıyndap, vedomstvonyń jumysyn keshendi tekserý jóninde Komıssııa qurǵanyn aıtty. Sózinshe, qarjy jáne áskerı bólimderdiń materıaldyq-tehnıkalyq qamtamasyz etilý jaǵdaıyna júrgizilgen aýdıttiń alǵashqy qorytyndysy jeti kún ishinde baıandalýy tıis.
— Budan bólek, Memleket basshysy on kún ishinde armııany reformalaýdyń arnaıy josparyn ázirleýdi tapsyrdy. Prezıdent atap ótkendeı, reformanyń basty mindeti — áskerı qyzmetshilerdiń qaýipsizdigi men ómiri negizgi basymdyqqa aınalatyn jańa úlgidegi armııa qurý. Osylaısha, az ǵana ýaqyttyń ishinde Memleket basshysy kadrlyq taǵaıyndaýdan bastap áskerdi túbegeıli reformalaýǵa deıingi barlyq negizgi sheshimderdi qabyldady, — dep túıindedi ol.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
25 qyrkúıekte, saǵat 9:15 shamasynda úzdiksiz júrgizilgen izdestirý-qutqarý jumystary nátıjesinde eki sarbazdyń denesi sýdan shyǵaryldy. Osylaısha teńiz-áskerı kúshteriniń 14 áskerı qyzmetshisi qaza boldy.
Prezıdent Qorǵanys mınıstrligindegi jaǵdaıdy tekseretin komıssııa qurǵan edi. Komıssııa júrgizilgen jumystyń alǵashqy nátıjeleri týraly jeti kún ishinde baıandaýǵa tıis.
Qyzmetke salǵyrt qarady, korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustalǵan bolatyn.
26 qyrkúıekte Mańǵystaý jurty qaza tapqan sarbazdardy sońǵy saparǵa shyǵaryp saldy.
Prezıdent Dáýren Qosanovty Qorǵanys mınıstri laýazymynan bosatty. Onyń ornyna Aıdos Myrzahmetov Qorǵanys mınıstri bolyp taǵaıyndaldy.
Budan bólek, áskerı oqý-jattyǵý kezinde aman qalǵan bir top áskerı qyzmetshige «Erligi úshin» medali tabystaldy.
