Mańǵystaýda jaǵalaýdan ólgen aqqýlar tabyldy
AQTAÝ. KAZINFORM — Áleýmettik jelide aqtaýlyq qoǵam belsendisi Azamat Sársenbaev ólgen aqqýlar men úırekterdiń beınejazbasyn bólisti. Aıtýynsha, ólekseler Saıyn Shapaǵatov eldimekeniniń 24 shaqyrymynda teńiz jaǵalaýynda jatyr. Turǵyn qustardyń sol mańdaǵy demalys bazasy men oǵan jaqyn ornalasqan kásiporynnan shyqqan sý jınalatyn jerde ólip jatqanyn aıtady.
Oblystyq Orman sharýashylyǵy jáne janýarlar dúnıesi aýmaqtyq ınspektsııasynyń basshysy Ǵabbas Dosatovtyń aıtýynsha, mamandar oqıǵa ornyna baryp, ólekselerden jáne atalǵan sýdan synamalar alǵan.
- Jappaı ólim tirkelgen joq. Veterınarlar ólgen qustardan synama aldy. Al ekologtar sýdan synama aldy. Qorytyndysy bir aptada shyǵady. Ony qosymsha habarlaımyz. Jalpy, qazir qustan mıgratsııasy júrip jatyr. Esep boıynsha «Qarakól» kólinde 4-5 myńdaı aqqý bar. Al araldarda kem degende 20 myń aqqý bar. Olar aýa raıynyń sýytýyna baılanysty kóship-qonyp júredi. Sol kezde álsiregeni bolady, 20 myńnyń arasynda biren-saran ólim – bul tabıǵı qubylys, - deıdi Ǵabbas Dosatov.
Buǵan deıin Aqtaýda álsirep, usha almaı qalǵan eki aqqý qutqarylǵan bolatyn.
