Mańǵystaýda tabıǵı parkte zańsyz ań aýlaǵan eki turǵyn ustaldy
AQTAÝ. KAZINFORM — Mańǵystaý oblysyndaǵy memlekettik «Qyzylsaı» óńirlik tabıǵı parkinde erekshe qorǵalatyn tabıǵı aýmaqta zańsyz ań aýlaǵan Beıneý aýdanynyń eki turǵynyn ınspektorlar anyqtady.
«Brokoner» jedel profılaktıkalyq is-sharasy aıasynda «Qyzylsaı» óńirlik tabıǵı parkine qarasty Manashy» memlekettik tabıǵı qaýmalynyń ınspektorlary Saıótes aýyldyq okrýginiń ýchaskelik polıtsııa qyzmetkerimen erekshe qorǵalatyn tabıǵı aýmaqtarǵa reıd ótkizdi.
«Toıota Prado» avtokóligi toqtatylyp, Beıneý aýdanyna qarasty Tólep aýylynyń eki azamaty ustaldy. Avtokólikti tekserý barysynda 1 ańshy myltyǵy, 17 dana 12 kalıbrli oq-dári jáne avtokólikterdiń júk salǵyshynan 4 qoıan tabyldy», - dedi «Qyzylsaı» memlekettik óńirlik tabıǵı parkiniń dırektory Myńbergen Qarataýov.
Qazirgi ýaqytta ustalǵan azamattar men tárkilengen zattar Mańǵystaý aýdandyq polıtsııa bólimine tabystalǵan.
