Mańǵystaýda senbilik jumystary mamyrǵa deıin jalǵasady
AQTAÝ. KAZINFORM - Mańǵystaý oblysynda jalpyhalyqtyq senbilik bastaý aldy. Bıyl oblys boıynsha ár qala men eldi mekenderde sanıtarlyq-tazartý jáne abattandyrý jumystary 16 naýryzdan bastap 15 mamyrǵa deıingi aralyqta júrgiziledi.
Oblystyq qoǵamdyq kommýnıkatsııa ortalyǵynyń málimentinshe, senbiliktiń maqsaty — óńir aýmaǵyn qoqystartan tazartý jáne halyqty tazalyqqa, birlikke, jaýapkershilikke shaqyrý, ekologııalyq saýattylyqty úgitteýge baǵyttalyp otyr.
«Bul is-shara jyl saıyn júzege asyrylady. 16 naýryzda Aqtaýdyń 4 shaǵyn aýdanyndaǵy «Brız» qaıyq klýbynan bastap «Dıskaı» teńiz jaǵajaıy mańyna deıin, 39 shaǵyn aýdan «Erjan Haziret» meshitinen bastap 34 shaǵyn aýdandaryndaǵy «Ana men bala» perzenthanasy ǵımaratyna deıin jáne 9 A shaǵyn aýdanynda «I love Aktau» kompozıtsııasynan «Samal» teńiz jaǵalaýyna deıingi aýmaqty qamtydy. Atalǵan is-sharaǵa memlekettik qyzmetshiler, ekobelsendiler jáne turǵyndar qatysty. Bul is-sharaǵa Aqtaý qalasy boıynsha 9 tehnıka jumyldyryldy jáne senbilikke qatysqan 230 adam qajetti quraldarmen qamtamasyz etildi», - dedi Aqtaý qalalyq turǵyn-úı kommýnaldyq sharýashylyq bóliminiń bas mamany Jantilek Asqatov.
Bul rette Aqtaý qalalyq turǵyn-úı kommýnaldyq sharýashylyq bóliminiń ókilderi 15 mamyrǵa deıin senbilik naýqanynyń jalǵasatyndyǵyn eskere otyryp, turǵyndarǵa belsendilik tanytýdy usynyp otyr.
