Mańǵystaýda Qazaqstan esimdi 2 turǵyn bar
AQTAÝ. KAZINFORM — Onyń biri — Júzbaev Qazaqstan Nurymuly 1957 jyly Shebir aýylynda týyp ósken. Esimin atasy qoıǵan.
— Meniń esimimdi ózimniń atam qoıǵan. Men dúnıege kelgende aýylda bir kisi balasynyń esimin Mańǵystaý dep qoıǵan eken. Sony estigen atam «men onda Qazaqstan dep qoıamyn» dep maǵan osy esimdi beripti. Atymdy estigen jurt tańyrqap, qaıta surap jatady, — deıdi Qazaqstan Júzbaev.
Qazaqstan Júzbaev bıyl — 68 jasta. Zeınetkerlikke shyqqansha mal sharýashylyǵymen aınalysyp, óndiriste jumys istegen. 1 ul, 3 qyz tárbıelep ósirdi. Búginde urpaǵynyń qyzyǵyn kórip, baqytty ǵumyr keship jatyr.
Al, ekinshi turǵyn — Tórebaev Qazaqstan Turymuly Jańaózen qalasynda turady. 59 jasta. Esiminiń ózindik tarıhy bar.
— Áke-sheshem balalary turmaı, birinen soń biri shetineı bergen soń, 1961 jyly Túrikmenstannan Qazaqstanǵa qonys aýdarǵan. Sol kezde aýyldaǵy bir úlken qarııa «Qazaqstanǵa kóshseńiz, balaǵa sol eldiń ataýyn qoıyńdar» depti. Sodan kóp uzamaı men dúnıege keldim. Anam esimimdi Qazaqstan dep qoıdy. Shúkir, 8 baýym bar. Ózimnen keıingi inimniń esimi — Mańǵystaý, — deıdi Qazaqstan Tórebaev.
Qazaqstan Tórebaev búginde 6 bala tárbıelep otyrǵan ardaqty áke.
Buǵan deıin, Aqtaýlyq jas shahmatshy álem chempıony atanǵany týraly jazǵan bolatynbyz.