Mańǵystaýda halyqaralyq jastar forýmy bastaldy
AQTAÝ. KAZINFORM — Aqtaýda І Halyqaralyq «Aktau Youth Forum» jastar forýmynyń ashylý saltanaty ótti. Oǵan bes eldiń jastary qatysyp jatyr. Bul týraly Mádenıet jáne aqparat mınıstrliginiń baspasóz qyzmeti habarlady.
Іs-shara Memleket basshysy Qasym-Jomart Toqaevtyń jastardy qoldaý jónindegi strategııalyq baǵyty aıasynda júzege asty.
Forýmnyń basty maqsaty — jastardyń ıntellektýaldy áleýetin, rýhanı qýatyn jáne azamattyq jaýapkershiligin arttyrý, sondaı-aq halyqaralyq yntymaqtastyqty nyǵaıtý.
Atalǵan forýmǵa Qazaqstannyń túkpir-túkpirinen kelgen jastarmen qatar Ázerbaıjan, Túrikmenstan, Ózbekstan, Qyrǵyzstan jáne Túrkııanyń jas kóshbasshylary men delegattary jınaldy. Qatysýshylar arasynda ǵylym, tehnologııa, sport, shyǵarmashylyq jáne qoǵamdyq salada jetistikke jetken talantty jastar bar.
Ashylý saltanatyna QR Mádenıet jáne aqparat mınıstrliginiń jastar jáne otbasy isteri komıtetiniń tóraǵasy Qaırat Qambarov pen óńir basshylyǵy qatysty.
Forým baǵdarlamasynda paneldik sessııalar, semınar-praktıkýmdar, vorkshoptar, sondaı-aq Mańǵystaý oblysynyń mádenı-tarıhı nysandaryna ekskýrsııalar bar. Sonymen qatar elimizdegi daryndy jastardyń júzege asyrǵan jobalarynyń kórmesi uıymdastyrylady.
Aıta keteıik, Astanada 7 qarasha kúni jastarǵa arnalǵan bos jumys oryndary jármeńkesi ótedi.