MÁMS esebinen 46 qaraǵandylyq qymbat ota jasatty

QARAǴANDY. QazAqparat – Qaraǵandy qalasynyń №1 kópsalaly aýrýhanasynyń dárigerleri jyl basynan beri 26 patsıentke tize býynyn aýystyrý operatsııasyn júrgizse, 20 naýqasqa jambas býynyn aýystyrdy. Osy maqsatqa medıtsınalyq saqtandyrý qory 50,2 mln teńge aýdardy, dep habarlaıdy QazAqparat tilshisi.

Tizeni aýystyrýǵa 3-4 dárejeli deformatsııalanǵan osteoartrıt negiz bolýy múmkin. Atalmysh aýrý býyn jaraqattarynan, juqpaly aýrýlardan jáne jasyna baılanysty ózgeristerden keıin paıda bolady. Eger buryn mundaı patsıentterdiń kópshiligi 55 jastan asqan adamdar bolsa, qazir 45 jastan asqandar ota jasatady. Býyndardaǵy ózgeristerdi rentgen arqyly kórýge bolady, qajet bolǵan jaǵdaıda dıagnozdy naqtylaý úshin birlesken KT nemese MRT taǵaıyndalady. Emhanada dıagnoz qoıylǵannan keıin naýqas josparly operatsııaǵa jiberiledi.

«Operatsııa 30-35 mınýtqa sozylady. Kishkentaı tilik jasalady – shamamen 10 sm. Zaqymdanǵan tize býyny alynyp tastalady. Onyń ornyna arnaıy materıaldan – tıtannan, plastıkten ımplant ornatylady. Italııalyq, amerıkalyq, japonııalyq ımplanttar qoldanylady. Bizdiń klınıkada portalǵa qoıylǵannan keıin kezek kútý ortasha eseppen 1-1, 5 aıdy quraıdy», - dedi №1 aýrýhananyń bólim meńgerýshisi Ǵalymbek Saılaýuly.

Qaraǵandylyq Tóleýtaı Ájikenova tize býynyn aýystyrǵannan keıin ońaltýdyń birinshi kezeńinen ótýde. Aýrýhanada qalpyna keltirý emi artromotpen aınalysýdy qamtıdy, onda býyn jattyqtyrylady jáne fızıoprotsedýralar jasalady.

«Operatsııa uzaqqa sozylmady. Barlyq tekserýler, taldaýlar emhananyń ózinde ótti. Men saqtandyrylǵandyqtan, JK retinde medıtsınalyq saqtandyrýǵa aı saıynǵy aýdarymdardy jasaımyn, tekserýler men operatsııa – barlyǵy tegin», - deıdi №1 kópsalaly aýrýhananyń patsıenti.

Tize aýystyrǵannan keıin qozǵalys apparatyn tolyq qalpyna keltirý shamamen úsh aıǵa sozylady. Alda ońaltýdyń taǵy eki kezeńi bar - olar da MÁMS paketine kiredi jáne saqtandyrylǵan azamattar úshin tegin.

Mundaı operatsııalar Qaraǵandynyń taǵy eki klınıkasynda jasalady.

33 jastaǵy Tóleý Mahambet jaraqattanǵan soń aýrýhanaǵa túsken. Er adamnyń súıegi synǵan, sodan keıin jalǵan býyn paıda boldy. Jambas býynyn aýystyrý qajettiligi týyndady, keıin anyqtalǵandaı, naýqas saqtandyrylmaǵan bolyp shyqty. Josparly kómekti tegin alý úshin qaraǵandylyq jyl basynan beri MÁMS qoryna jarna engizgen. Sonan soń saqtandyrylǵan patsıentke qymbat operatsııa tegin jasaldy.

«Maǵan tanysym saqtandyrylýym kerek ekenin aıtty, sonda men barlyq kómekti tegin alatyn bolamyn dedi. Men birden bir jylǵa tóledim. Keıin rentgendi tegin jasattym, analız tapsyrdym, operatsııany da tegin ótkizdi», - deıdi Tóleý Mahambet.

Jambas aýystyrý operatsııalaryn kópsalaly aýrýhananyń hırýrgtary 20 naýqasqa jasady. Olardyń shyǵynyn óteý úshin medıtsınalyq saqtandyrý qory 21,8 mln teńge jumsady. Taǵy 28,4 mıllıon teńge 26 naýqastyń tize aýystyrý operatsııasyna aýdaryldy.