MÁMS: Balalar ata-analar úshin aqsha tóleıdi

  ASTANA. QazAqparat - Búgin QR Prezıdenti janyndaǵy Adam quqyqtaryn qorǵaý jónindegi komıssııanyń otyrysynda mindetti áleýmettik medıtsınalyq saqtandyrý máselesi keńinen talqylandy. Sol jerde QR Densaýlyq saqtaý mınıstri Eljan Birtanov jarnalardy jeke esep-shotta jınaýǵa qatysty suraqqa jaýap berip, áleýmettik jaýapkershiliktiń mańyzdylyǵyn túsindirdi, dep xabarlaıdy QazAqparat tilshisi.

Mınıstrdiń aıtýynsha, búginde kez kelgen adam óz densaýlyǵyn jekemenshik kompanııada saqtandyra alady. Sol jerde aýrýyna qaraı tólem jasaýǵa múmkindik bar. Degenmen, onkologııalyq jáne taǵy basqa sozylmaly aýrýlarǵa shaldyqqandar ondaı saqtandyrýdy kóp jaǵdaıda kótere almaıdy. Sebebi keıbir operatsııalardyń baǵasy 10-15 mln teńgege deıin barady. Soǵan qaraı jekemenshik kompanııaǵa jarnany da kóptep quıýǵa týra keledi. Al áleýmettik medıtsınalyq saqtandyrý - ol ujymdyq shart.

"Iá, jas ári saý azamattar medıtsınalyq kómekke kóp júginbeıdi, biraq jarnany turaqty túrde tóleýi tıis. Alaıda, egde jastaǵy adamdar men balalardyń ol qyzmetterdi jıi paıdalanatynyn umytpaý qajet. Qazirgi jastar da erteń ata-ana bolady. Sol kezde olar úshin de balalary jarna jasaıdy" - deıdi Eljan Amantaıuly.

Mınıstrdiń aıtýynsha, mindetti áleýmettik-medıtsınalyq saqtandyrý qorynyń qarjysy Ulttyq banktiń arnaıy esep-shotynda saqtalady. Ony nesıe retinde eshkimge berýge bolmaıdy.

"Medıtsınalyq saqtandyrý qorynyń aqshasy tek medıtsınalyq qyzmetterge ǵana jumsalýy qajet. Bul - zań talaby. Qorda aqsha qalyp otyrady dep aıta almaımyn. Sebebi bizde medıtsınalyq qyzmetter kóp. Bizdiń qazirgi esebimizge sáıkes, barlyq aqsha densaýlyq salasyna jumsalatyn bolady", - dep atap kórsetti mınıstr Birtanov.