Malaızııa BRIKS-ke qosylýǵa nıet bildirdi
ASTANA.KAZINFORM — Qyrkúıektiń 5-i kúni Shyǵys ekonomıkalyq forýmynyń (ShEF) plenarlyq otyrysynda Malaızııa premer-mınıstri Anvar Ibragım óz eliniń BRIKS-ke qosylýǵa nıetti ekenin aıtty.
ShEF plenarlyq sessııasynda sóılegen sózinde Anvar Ibragım:
«Malaızııa BRIKS-ke qosylýǵa nıetti jáne bul arqyly biz ekonomıkalyq dıplomatııadaǵy kúsh-jigerimizdi ártaraptandyrýǵa jáne uıymǵa múshe eldermen yntymaqtastyqty nyǵaıtýǵa umtylamyz» dedi.
Sondaı-aq ol BRIKS-ke qosylý basqa eldermen qarym-qatynasty nyǵaıtýǵa jáne ózara tıimdi saýda baılanystaryn damytýǵa múmkindik beretinin aıtty.
Onyń pikirinshe, Malaızııa jahandyq álemniń bir bóligi jáne el úshin saýda qatynastaryn odan ári damytyp, nyǵaıtý mańyzdy. Malaızııa álem boıynsha saýda qatynastaryn nyǵaıtýǵa umtylady.
Esterińizge sala keteıik, Shyǵys ekonomıkalyq forýmy 3-6 qyrkúıek aralyǵynda Vladıvostok qalasyndaǵy (Reseı) Qıyr Shyǵys federaldy ýnıversıtetiniń kampýsynda ótip jatyr.
BRIKS 2006 jyly Brazılııa, Reseı, Úndistan jáne Qytaı tarapynan qurylǵan. Ońtústik Afrıka uıymǵa 2011 jyly qosyldy.
2024 jyldyń 1 qańtarynda Mysyr, Iran, Birikken Arab Ámirlikteri, Saýd Arabııasy jáne Efıopııa toptyń tolyqqandy músheleri boldy.
Bıyl qaýymdastyqqa Reseı tóraǵalyq etip jatyr.
