Maksım Galkın otbasymen Izraılde qalatyn boldy
Tanymal reseılik ázil-syqaqshy Maksım Galkın otbasymen birge Izraılde qalatynyn, tipti basqa elge ketý múmkindigin qarastyrmaǵanyn málim etti, dep habarlaıdy Kazinform agenttiginiń tilshisi.
«Izraıl úshin qıyn bolyp jatqan kúnderi biz osyndamyz jáne basqa jaqqa ketý múmkindigi bolsa da, qarastyrǵan emespiz. Áýejaı ashyq. Áýe kompanııalary qorqyp, qaýiptengenimen ushyp jatyr, sol sebepti ketip qalýǵa bolar edi. Biraq biz eshqaıda barmaımyz. Biz jubaıym Alla jáne balalarymyzben birge osyndaı qıyn kezeńde Izraıl halqyna qoldaý kórsetkimiz keledi. Bul – úlken qaıǵy. Biz osyndaı aırandaı uıyp otyrǵan ultqa qatysymyz bar ekenin maqtan tutamyz», - dep atap ótti Maksım Galkın.
Sondaı-aq syqaqshy pasport qajet bolǵany úshin Izraılde turyp jatpaǵanyn aıtty.
«Menen nege maıdanda júrmegenimdi surap jatqandar bar. Eger men Izraıl áskerinde qyzmet etsem jáne Izraıldi qorǵaıtyndaı bir negiz bolsa, barar edim. Biraq men basqalaı kómektese alamyn: qan tapsyramyn. Orys tilinde sóıleıtin ızraıldikterge osyndaı qıyn-qystaý kezde Alla ekeýimizdiń osynda ekenimiz mańyzdy dep oılaımyz. Biz munda pasport qajet bolǵannan turyp jatqan joqpyz. Osynda keldik jáne men balalardyń birden ıvrıt tilinde oqytatyn mektepke barýyn qamtamasyz ettim. Bizde olardy amerıkalyq dıplomatııalyq mektepke beretin múmkindik boldy. Biraq men balalarymnyń ızraıldikter sııaqty ıvrıt tilinde sóılegenin qaladym. Men de til úırenip jatyrmyn», - dep tolyqtyrdy Maksım Galkın.
Senbi kúni palestınalyq HAMAS toby Izraılge shabýyl jasap, el soǵys jaǵdaıyna kóshkennen keıin birqatar memleket azamattaryn Izraılden evakýatsııalaýdy uıymdastyrǵanyn eske sala keteıik.
Dúısenbi kúni tańerteń Izraıl áskeriniń resmı ókili barlyq eldi meken baqylaýǵa alynǵanyn jáne Izraıl aýmaǵynda áskerı is-qımyl júrgizilip jatqan joq dep málimdedi. Degenmen Izraıl aýmaǵynda áli de HAMAS áskeri bolýy múmkin ekeni aıtylady.
Búgin HAMAS Tel-Avıvtegi áýejaıǵa zymyran ushyrǵany belgili boldy. Sondaı-aq Izraıl qorǵanys mınıstri Ioav Gallant Gazanyń tolyq oqshaýlanǵanyn málim etti. Ol jaqta jaryq, tamaq jáne otyn joq.