Makron Pýtınmen kelissózdi aldaǵy aptalarda ótkizbek

ASTANA. KAZINFORM — Frantsııa prezıdenti Emmanıýel Makron Reseı kóshbasshysy Vladımır Pýtınmen múmkindiginshe tezirek áńgimelesýge nıetti ekenin málimdedi, dep habarlaıdy TASS.

— Barlyǵy qysqa merzimde uıymdastyrylýy kerek. Qazirgi ýaqytta baılanys qalpyna keltirilip jatyr, ol aldaǵy aptalarda bolýy kerek, — dedi ol France 2 telearnasyna bergen suhbatynda.

Makron dıalogtyń «múmkindiginshe tezirek» ótýi kerek ekenin atap ótti.

Telearna tilshisi Makronnyń Pýtınmen sóılesý paıdaly bolatyny týraly jaqynda aıtqan málimdemesin eske salyp, bul máselede ilgerileýshilik bar ma dep surady.

Buǵan deıin RF Syrtqy ister mınıstri Sergeı Lavrov eger Makron sóılesýge daıyn bolsa, Reseı árqashan dıalogqa ashyq ekenin málimdegen bolatyn. RF prezıdentiniń baspasóz hatshysy Dmıtrıı Peskov Reseı men Frantsııa kóshbasshylary arasynda dıalog týraly usynystar túsken jaǵdaıda Kreml habarlaıtynyn atap ótti.

Buǵan deıin habarlaǵanymyzdaı, Frantsııa men Ulybrıtanııa Ýkraına aýmaǵynda atysty tolyq toqtatqannan keıin óz áskerlerin ornalastyrý nıetin rastady. Bul sheshim «Batyldar koalıtsııasy» men AQSh usynǵan qaýipsizdik kepildikteri paketi aıasynda qabyldanyp otyr jáne Reseı tarapynan bolashaqta qaıta shabýyl jasaý qaýpiniń aldyn alýǵa baǵyttalǵan.