Maǵjanǵa arnalǵan moneta shyǵaryldy
ASTANA. 30 mamyr.QazAqparat - Qazaqstan Respýblıkasynyń Ulttyq Banki 2013 jylǵy 28 mamyrdan bastap neızılber qospasynan jasalǵan nomınaldyq quny 50 teńgelik M.Jumabaevtyń 120 jyldyǵyna arnalǵan eskertkish monetany aınalysqa shyǵaratyndyǵyn habarlady,
dep jazady Baq.kz.
Monetanyń qyry bederli jáne qaptalyndaǵy beıneler men jazýlar shyǵyńqy. Dıametri - 31 mm., massasy - 11,17 gramm, taralymy - 100 000 dana.
Nomınaly 50 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq shottarǵa, salymdarǵa, akkredıtıvterge esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.
Eskertkish monetany «Qazaqstan Respýblıkasy Ulttyq Bankiniń Qazaqstan teńge saraıy» sharýashylyq júrgizý quqyǵy bar respýblıkalyq memlekettik kásiporny daıyndaǵan.
Monetanyń dızaıny Qazaqstan Respýblıkasy Prezıdentiniń 2003 jylǵy 25 qyrkúıektegi № 1193 Jarlyǵymen bekitilgen Ulttyq valıýta - Qazaqstan teńgesi banknottary men monetalary dızaınynyń tujyrymdamasyna sáıkes ázirlengen.
Neızılber qospasynan jasalǵan eskertkish monetalardyń bir myń danasy jaqsartylǵan sapamen daıyndaldy jáne arnaıy plastıkalyq termovakýýmdy oraýǵa salynǵan.
Eske sala ketsek, 2013 jylǵy 25 maýsymda Alash arysy, aqyn, pýblıtsıst, pedagog, jańa qazaq ádebıetiniń negizin qalaýshylardyń biri Maǵjan Jumabaevtyń týylǵanyna 120 jyl tolmaq.
