Madrıdte qazaq kınosynyń kúnderi bastaldy

MADRID. QazAqparat – Madrıdtiń tarıhı ortalyǵynda, Ásem ónerler ortalyǵy kınoteatrynda Ulttyq kınony qoldaý memlekettik ortalyǵy men Qazaqstannyń Ispanııadaǵy Elshiliginiń qolǵabysymen Qazaqstan kınosy kúnderiniń resmı ashylý rásimi ótti, dep habarlaıdy QazAqparat.

Syrtqy saıası vedomstvonyń málimetinshe , sharaǵa Ispanııanyń Syrtqy ister, Eýropalyq odaq jáne yntymaqtastyq mınıstrliginiń ókilderi, dıplomatııalyq korpýs, qazaqtandyqtar dıaspora, sheteldik kınosúıer qaýym qatysty.

Kórsetilim bastalar aldynda sóılegen sózinde Qazaqstan Elshisi Konstantın Jıgalov bul shara eki el arasynda dıplomatııalyq qarym-qatynas ornaǵanynyń 30 jyldyǵyna oraılastyrylǵanyn habarlady.

Qazaqstandyq dıplomat eki el arasyndaǵy mádenı almasýdyń joǵary deńgeıin atap ótti.

Onyń ishinde sońǵy jyldardaǵy «Astana Opera» memlekettik opera jáne balet teatry men Qurmanǵazy atyndaǵy Qazaq memlekettik akademııalyq halyq aspaptary orkestriniń gastroldik sapary, zamanaýı qazaq prozasy men poezııasynyń antologııasynyń ıspan tilindegi tusaýkeseri bar.

K. Jıgalov 2016 jyldan beri «Qazaqfılm» kınostýdııasy men Qazaqstan Elshiliginiń qoldaýymen Barselonada ótetin jyl saıynǵy Azııa kınofestıvalinde qazaqstandyq fılmder turaqty túrde kórsetilip kele jatqanyna toqtaldy.

Ásem ónerler ortalyǵynda rejısser Ernar Nurǵalıevtiń «Alǵa» jáne rejısser Farhad Sháripovtiń «Shema» fılmderiniń eýropalyq premerasy ótip, oǵan F. Sháripov jáne «Alǵa» fılminiń prodıýseri Maksım Akbarov qatysty.

Madrıdtegi qazaq kınosynyń kúnderi kópshiliktiń kóńilinen shyqty.

Búginniń ózinde Ispanııanyń ortalyq gazetteriniń biri – «La Vanguardia» basylymynda osy oqıǵaǵa arnalǵan materıal jarııalandy.

Foto: gov.kz