ІІM: Túrkistan oblysynda ekstremıstik materıaldardy taratqan top ustaldy
ASTANA. KAZINFORM – Іshki ister organdarynyń qyzmetkerleri Túrkistan oblysynda ekstremıstik materıaldardy taratyp, dinı alaýyzdyqty qozdyrýǵa tyrysqan kúdiktilerdi ustady,
Polisia.kz-tiń málimetinshe ekstremızmge qarsy is-qımyl bólinisiniń qyzmetkerleri UQK-men birlesip, quramynda Maqtaaral aýdanynyń turǵyndary bar radıkaldy dinı toptyń qylmystyq áreketin toqtatty.
— Jedel-izdestirý is-sharalary barysynda kúdiktilerdiń bul topqa radıkaldy dinı kózqarastary boıynsha birikkeni anyqtaldy. Olar áleýmettik jelilerde basqa dindegi azamattardyń qadir-qasıetin jáne dinı sezimderin qorlaıtyn sózder jarııalap otyrǵan. Sot buryn ekstremıstik dep tanyǵan aýdıo jáne beınematerıaldardy halyq arasynda taratqan, — dedi ІІM-de.
Kúdiktilerdiń turǵylyqty jeri men jumys oryndaryn tintý barysynda 20-dan astam dinı ádebıet, esirtki quraldary, oq-dáriler, zańsyz saqtalǵan qarý jáne basqa da zattaı aıǵaqtar tárkilendi. Top jetekshileri sottyń sanktsııasymen qamaýǵa alyndy.
— Jasalǵan qylmystyq áreketterdiń barlyq mán-jaıyn anyqtaýǵa baǵyttalǵan jedel-tergeý is-sharalary jalǵasyp jatyr, — dep atap ótti polıtsııa vedomstvosy.
Aıta ketelik Astanada ekstremıstik top músheleri ustalǵan edi.