SQO-da aýyldaǵy jańa órt sóndirý pýnkti maman joqtyǵynan jabyq tur
PETROPAVL. KAZINFORM - Soltústik Qazaqstan oblysynda aýyldarda órt qaýipsizdigin arttyrýǵa baǵyttalǵan «Aýyl qutqarýshylary» baǵdarlamasy aıasynda 11 órt sóndirý pýnkti jumys istep tur.
Oblys ákimdiginde ótken jıynda óńirdegi órt qaýipti kezeńniń ótý barysy talqylandy.
SQO Tótenshe jaǵdaılar departamenti bastyǵy Jomart Asqarovtyń aıtýynsha, «Aýyl qutqarýshylary» jobasy aıasynda ashylǵan beketter zamanaýı talaptarǵa saı jabdyqtalǵan. 78 erikti órt sóndirýshi arnaıy oqytýdan ótip, reestrge engizilgen. Bul pýnktter Shal aqyn, Ǵ.Músirepov atyndaǵy aýdan, Esil, Qyzyljar, Taıynsha aýdandarynda ornalasyp, shalǵaı eldi mekenderdegi tótenshe jaǵdaılarǵa jedel áreket etýge múmkindik berip otyr.
- Bıyl Ýálıhanov aýdanyndaǵy Bıdaıyq jáne Aqbulaq aýyldarynda, sondaı-aq Aqqaıyń aýdanyndaǵy Tokýshı aýylynda úsh pýnkt jańǵyrtyldy. Materıaldyq-tehnıkalyq bazany kúsheıtý maqsatynda departamentten 10 avtotsısterna jáne 1 ÝAZ, qajetti órt-tehnıkalyq qural-jabdyqtar berildi, - deıdi Jomart Asqarov.
Jol kartasyna sáıkes bıyl taǵy osyndaı 31 beket ashylýy tıis. Onyń 12-si jańadan qurylsa, qalǵany jańartylmaq. Biraq jobany júzege asyrýda másele bar.
- Shal aqyn aýdanyndaǵy Uzynjar men Qyzyljar aýdanyndaǵy Rassvet aýyldarynda jumys merziminde aıaqtalmaǵan, Qyzyljar aýdanynyń Asanovo aýylynda qarjy tapshylyǵyna baılanysty joba iske aspaı qalý qaýpi bar.
Al Taıynsha aýdanyndaǵy Letovochnoe aýylynda byltyr jeltoqsanda ashylǵan pýnkt qyzmetkerlerdiń joqtyǵyna baılanysty bıyl sáýir aıynda jabylyp qalǵan, - deıdi departament bastyǵy.
Buǵan deıin Abaı oblysynda órttiń aldyn alýǵa arnalǵan jańa oqý-tájirıbelik keshen ashylǵanyn jazǵan edik.
