ІІM: 9 esirtki zerthanasy joıyldy
ASTANA. KAZINFORM — Osy jyldyń maýsym aıynan bastap «Qarasora-2025» keń aýqymdy jedel-profılaktıkalyq is-shara ótkizilip jatyr.
Onyń negizgi maqsaty — esirtki ósimdikteriniń tabıǵı oshaqtary men zańsyz egisterin anyqtap, joıý, esirtki zerthanalary men jetkizý arnalarynyń qyzmetin toqtatý, sondaı-aq esirtkini taratýmen aınalysatyn uıymdasqan qylmystyq toptardy áshkereleý.
Atqarylyp jatqan jumystarǵa ІІM-niń arnaıy bólimsheleri men Ulttyq ulannyń kúshteri tartylǵan. Operatsııa barysynda ushqyshsyz ushý apparattary men tikushaq tehnıkasy belsendi qoldanylady. Úsh aı ishinde 40 áýe ushýy júrgizilip, nátıjesinde 20 esirtki egistigi anyqtaldy, 5 myńnan astam esirtki ósimdikteri joıylyp, 1 tonnadan astam salmaqta tárkilendi.
Ulytaý oblysynda esirtkini elimizdiń ońtústik óńirlerinen ortalyq jáne soltústik aımaqtarǵa jetkizý arnasy áshkerelendi. Quramynda tórt adam bar qylmystyq top ustaldy. Olardan jol talǵamaıtyn avtokólikter, oq-dárileri bar atys qarýy jáne taratýǵa arnalǵan 103 keli marıhýana tárkilendi.
Jambyl oblysynda marıhýanany daıyndap, satýǵa daıyndaýmen aınalysqan eki azamat ustaldy. Olardan 206 keli astam esirtki zaty anyqtalyp, tárkilendi.
Batys Qazaqstan oblysynda, jeke turǵyn úıler ornalasqan aýmaqta, zańsyz túrde joǵary kontsentratsııaly qarasora ósirilgen jylyjaı anyqtaldy. Operatsııa barysynda 47 túp, jalpy salmaǵy 135 keli esirtki ósimdigi alyndy.
Túrkistan oblysynda, taýly jáne qol jetýi qıyn aımaqtarda ІІM men Ulttyq ulannyń birlesken arnaıy toby jedel is-sharalar júrgizdi. Nátıjesinde úsh azamat ustalyp, olardan atys qarýy, sondaı-aq 650 keliden astam qarasora men 48 keli kóknár ósimdigi tárkilendi.
Jezqazǵan jáne Sátbaev qalalarynda zańdy taýar retinde búrkemelengen esirtki zattaryn jetkizý faktisi anyqtaldy. Zańsyz aınalymnan jalpy salmaǵy 43 tonnadan astam kóknár tárkilendi.
Esirtki qylmysyna qarsy is-qımyl keshendi ári júıeli sıpatqa ıe.
«Qarasora-2025» operatsııasynyń úsh aıyndaǵy nátıjeler: 677 esirtki qylmysy anyqtaldy,
onyń ishinde 242 — satý, 220 — zańsyz egis faktileri; 2 tonna marıhýana, 47 keli gashısh, 3 tonna qarasora, 155 keli sıntetıkalyq esirtki jáne 8,5 tonna prekýrsor tárkilendi; 27 myńnan astam esirtki ósimdigi joıyldy; 9 esirtki zerthanasy joıylyp, 3 uıymdasqan qylmystyq toptyń, sonyń ishinde bir transulttyq toptyń qyzmeti toqtatyldy.
Bul baǵyttaǵy jumys jalǵasyp jatyr.