Polıtsııa tórt aıda 20 uıymdasqan qylmystyq toptyń jolyn kesip, 3,5 tonna esirtki tárkiledi

ASTANA. KAZINFORM - Іshki ister mınıstrligi «Zań men Tártip» qaǵıdaty boıynsha esirtki qylmysyna qarsy kúresti jalǵastyrýda, - dep habarlaıdy Polisia.kz.

- Tórt aıda úsh myńǵa jýyq esirtki quqyq buzýshylyǵy anyqtaldy. Onyń ishinde 828 satý faktisi bar. Zańsyz aınalymnan shamamen 3,5 tonna esirtki tárkilendi: 259 kg sıntetıka, eki tonnaǵa jýyq marıhýana, 303 kg gashısh. 83 esirtki zerthanasy joıyldy. Alty tonnaǵa jýyq prekýrsor tárkilendi. 20 uıymdasqan qylmystyq toptyń joly kesildi. Zańsyz kontenti bar 11 myńnan astam saıt, sondaı-aq 1 mlrd teńgeden astam somaǵa 12 myń bank kartasy men shot buǵattaldy. 1783 adam ustaldy, onyń 669-y qamaýǵa alyndy, - dedi ІІM esirtki qylmysyna qarsy is-qımyl komıteti tóraǵasynyń mindetin atqarýshy Danııar Meıirhan.

Spıkerdiń sózinshe, sáýir aıynda birqatar sátti operatsııa júrgizildi. Qosshy qalasynda Aqmola oblysynyń týmasy ustaldy. Onyń avtokóliginen 6,5 kg a-rvr sıntetıkalyq esirtkisi tárkilendi. Odan keıin júrgizilgen is-sharalar barysynda basqa da kúdiktiler - Soltústik Qazaqstan oblysynyń turǵyndary ustaldy. Olardan taǵy bir kılogramm sıntetıka tárkilendi. Astana qalasynda Aqtóbe turǵyny ustaldy. Odan 2,5 kg sıntetıkalyq esirtki tárkilendi.

- Barlyq kúdikti ýaqytsha ustaý ızolıatoryna qamaldy. Bul baǵyttaǵy jumys jalǵasýda, - dedi Danııar Meıirhan.

Aıta keteıik, 2025 jylǵy naýryzdan bastap Ákimshilik quqyq buzýshylyq týraly kodekstiń 440-1-baby kúshine endi, ol jeke úı-jaılarda esirtkini medıtsınalyq maqsattan tys paıdalanǵany úshin jaýapkershilikti kózdeıdi.