LRT alǵashqy eki quramy Astanaǵa jetkizildi

ASTANA. KAZINFORM – Elordaǵa jeńil relsti kóliktiń alǵashqy jyljymaly quramy jetkizildi. Quramdar arnaıy jabdyqtalǵan avtotraldarmen ákelindi. Olardyń árqaısysy tórt vagonnan turady. Bul týraly CTS kólik kompanııasy habarlady. 

— Vagondar Tanshan qalasynda (Qytaı) shyǵaryldy. Avtokólikpen jetkizý Qytaı men Qazaqstan aýmaqtary arqyly ótetin, uzyndyǵy 5 300 km-den asatyn marshrýt boıynsha júzege asyryldy. Búkil jol 10 kúnge sozyldy. Avtotral platformalaryna sektsııalardy tıeý tikeleı óndirýshi zaýyttaǵy krandardyń kómegimen júzege asyryldy. Marshrýttyń barlyq kezeńinde júkterdiń bekitilýi men qaýipsizdiktiń qatań sharalary qamtamasyz etildi, — delingen habarlamada.

Uzyndyǵy 60 metrlik jyljymaly quramdar GOA 4 deńgeıindegi avtomattandyrylǵan baǵdarlamalyq-apparattyq keshenmen jabdyqtalǵan, ol kelesi fýnktsııalardy qamtamasyz etedi: esikterdiń avtomatty túrde ashylyp-jabylýy, toqtaý jáne jyldamdatý, depoǵa kirý jáne shyǵý, quramdardyń jaǵdaıyn baqylaý, sondaı-aq poıyzdar arasyndaǵy qashyqtyqty qadaǵalaý.

— Quramdar tolyqtaı avtomattandyrylǵan, basqarý júıesi júrgizýshisiz júzege asyrylady jáne operatorlar tarapynan únemi baqylaýda bolady. Atalǵan quramdardy óndirý barysynda zamanaýı, jeńil jáne berik materıaldar qoldanyldy. Bul sheshim jolaýshylarǵa qolaıly dınamıkalyq sıpattamalar men joǵary deńgeıdegi akýstıkalyq jaılylyqty qamtamasyz etýge baǵyttalǵan, — delingen habarlamada.

Quramdardyń jalpy tehnıkalyq parametrleri:

— Uzyndyǵy — 59,97 m, eni — 2,8 m, bıiktigi — 3,8 m;

— Qýat kózi túri: úshinshi rels, 750 V;

— Syıymdylyǵy: 600-den astam jolaýshy;

— Eń joǵary jyldamdyǵy: 80 km/saǵ;

— Ortasha paıdalaný jyldamdyǵy: 39,5 km/saǵ;

— Salmaǵy: 94 t (jolaýshylarsyz).

Vagondardy satyp alý jáne tasymaldaý EPC-kelisimshart sheńberinde júzege asyrylady, ıaǵnı jeke bıýdjettik qarjylandyrý bólinbeıdi.

Aıta ketelik Jeńis Qasymbek 2026 jyldyń 1-toqsanynda LRT resmı iske qosylatynyn aıtqan edi.