London polıtsııasy telefon urylaryn ustady

ASTANA. KAZINFORM — London polıtsııasy mobıldi telefon urlyǵyna qarsy aýqymdy operatsııa júrgizip jatyr, dep habarlaıdy Kazinform tilshisi.

Operatsııa barysynda uıymdasqan toptardyń 20 qatysýshysy ustaldy. Arnaıy sharalar Londonnyń eń problemaly aýdandarynda ótkizilgen reıdter aıasynda iske asyryldy, bul óz kezeginde mundaı qylmystardyń aıtarlyqtaı azaıýyna yqpal etti.

Polıtsııa (Metropolitan Police) sársenbi kúni alty qylmystyq top múshesiniń ustalǵan sátin kórsetken beınejazba taratty.

Ustalǵandardyń jasy 17 men 19 aralyǵynda. Olardyń beseýine tonaý, urlyq jáne alaıaqtyq baptary boıynsha aıyp taǵyldy. Al altynshysy sýyq qarý men kannabıs saqtaǵany úshin jaýapqa tartyldy.

London kóp jyldan beri telefon urlyǵynyń «astanasy» atanyp keledi. Brıtan astanasynyń ár turǵyny derlik bul qylmyspen bir ret bolsa da betpe-bet kelgen: byltyr olardyń óz telefonyn nemese tanysynyń qurylǵysyn urlatyp alǵan jaǵdaılary jıi bolǵan.

Statıstıkaǵa súıensek, Londonda ár alty mınýt saıyn bir telefon urlyǵy tirkeledi. Bul jylyna shamamen 64 myń jaǵdaı. Sońǵy ýaqytta mundaı qylmys 150%-ǵa artqan, sondyqtan bılik dabyl qaǵyp otyr.

Keıbir jaǵdaılarda telefon urlyǵy zorlyq-zombylyqpen qatar júredi. Ótken jyldyń mamyr aıynda 28 jastaǵy jýrnalıst Ent Nýnan túnde kontsertten úıine qaıtyp kele jatqanda qaraqshynyń shabýylyna ushyrady. Beıtanys adam ony ustap, telefondy berýdi talap etip, soqqy jasaǵan. Nýnan polıtsııaǵa shaǵymdanǵanymen, keıin tergeý barysy týraly esh habar ala almaǵan.

Qylmyskerler barǵan saıyn batyl áreket etip jatyr. Ótken jyldyń naýryzynda polıtsııa Londondaǵy eń áıgili telefon urylarynyń biri — 28 jastaǵy Sonnı Strıngerdi ustady. Ol elektrovelosıpedpen júrip, ótip bara jatqan adamdardyń qolynan telefondaryn julyp áketken. Bar bolǵany bir saǵatta 24 telefondy qoldy qylǵan qylmysker eki jylǵa bas bostandyǵynan aıyryldy.

Buǵan deıin biz Italııada qylmyskerlerdiń brıtandyq lordtyń qolynan quny £175 myń turatyn saǵatyn julyp ketkenin habarlaǵan edik.