Qyzylorda saýda oryndarynyń qaýipsizdigi 2 aı boıy tekseriledi
QYZYLORDA. QazAqparat - Syr óńirinde aldaǵy 2 aı kóleminde adam kóp shoǵyrlanǵan nysandardyń órt qaýipsizdigi tekseriledi, dep habarlaıdy QazAqparat tilshisi.
Bul jóninde oblystyq tótenshe jaǵdaılar departamentiniń bastyǵy Omar Berjanov málim etti.
«Tótenshe jaǵdaılar salasynyń mamandary Syr óńiri turǵyndaryn 20 naýryzda bastalǵan tazalyq aılyǵy barysynda abaı bolýyn suraımyz. On kúnnen astam ýaqyttyń ishinde bizge 52 órt sóndirýge baılanysty dabyl qaǵylǵan. Onyń 7-i órt retinde tirkelse, 45-i órtke jatpaıtyn janý boldy. Aımaqta 2 avtokóliktiń órtený jaǵdaıy da tirkelgen»,- deıdi O.Berjanov óńirlik kommýnıkatsııalar qyzmetinde ótken baspasóz máslıhatynda.
Sondaı-aq, ol shara barysynda turǵyndar jıi shoǵyrlanatyn oryndar, 15 saýda úıi tekserýden ótetindigin aıtty. Olardyń arasynda oblys ortalyǵynda oryn tepken «Jibek joly» oıyn-saýyq ortalyǵy, «Muz aıdyny», «Araı» sport-saýyqtyrý keshenderi bar.
Sondaı-aq, bazarlardaǵy órtke qarsy qaýipsizdiktiń saqtalýyna nazar aýdarylady. Oǵan qosa 300-den astam jeke balabaqshalar da tekserýden ótkiziledi. Onda otqa tez janyp ketetin qurylys materıaldary, joǵary qabattardaǵy oıyn-saýyq alańdarynyń ornalasý zańdylyǵyna kóńil bólinedi. Byltyr osyndaı tekseý sharasy barysynda 86 órt qaýipsizdigi talaptarynyń buzylǵandyǵy anyqtalǵan.
Ádilet QAŃTARBAEV
Illıýstratsııalyq foto
