Qyzylorda oblysynyń eks-ákimi qaıtys boldy
Atpal azamat sanaly ǵumyryn eliniń damýyna jumsaǵan bolatyn. Ol Syr elin Táýelsizdiktiń alǵashqy jyldarynda basqardy. Eń qıyn kezeńde bılikti tizgindegen basshy biliktiliginiń arqasynda túıitkildi máselelerdi sheshe bildi. Jumyssyzdyqpen kúresýdi qolǵa alyp, aýyl sharýashylyǵy salasyn damytýǵa súbeli úlesin qosty.
Seıilbek Shaýhamanov 1939 jyly Qyzylorda oblysy Jańaqorǵan aýdanyna qarasty Ózgent aýylynda dúnıege keldi. 1962 jyly Qazaq memlekettik aýyl sharýashylyǵy ınstıtýtyn bitirdi. Munan soń Almaty joǵary partııa mektebinide bilimin jetildirdi. Eńbek jolyn «Qazaýylsharýatehnıkasy» birlestiginde qarapaıym mehanık bolýdan bastady. Tynymsyz eńbektiń nátıjesinde atalmysh mekemeniń ınjeneri bolyp eńbek etti. 1965-1991 jyldary Keńes Odaǵy kommýnıstik partııasynyń múshesi boldy.1975-1980 jyldary Jalaǵash aýdanynyń ekinshi sekretari qyzmetin abyroımen atqardy. Ol Qyzylorda oblysy ákimshiliginiń birinshi basshysy boldy. Al 1992 jyly QR Prezıdenti Nursultan Nazarbaevtyń buıryǵymen Qyzylorda oblysynyń ákimi bolyp taǵaıyndaldy. Sondaı-aq, Seıilbek Shaýhamanov QR Parlamenti Senatyna saılanǵan tuńǵysh depýtat bolatyn. Ómiriniń sońyna deıin qoǵamdyq ómirge belsene aralasyp, oblystyq ardagerler keńesiniń tóraǵasy qyzmetin atqardy.
Seıilbek Shaýhamanov - tarıhı tulǵa. Ol aýyldy gúldendirýge kóp kóńil boldy. Ala jazdaı egin basynda ter tógetin sharýalarǵa úlken qoldaý kórsetti. Táýelsizdik alǵan jyldary eseńgirep qalǵan halyqty bir baǵytta jumyldyra bildi. Eseli eńbektiń arqasynda halyqtyń qurmet - qoshemetine bólendi. Qashanda tájirıbesimen bólisýge asyǵatyn. Oblystyń eks-ákimi zeınetke shyqqannan keıin de qoǵamdyq ómirge belsene aralasatyn. Ótkir máseleler týrasynda batyl pikirler aıtyp, aımaq damýyna beı-jaı qaraǵan joq.
Búgin Nartaı Bekejanov atyndaǵy oblystyq drama teatrynda Seıilbek Shaýhamanovpen qoshtasý rásimi men qaraly mıtıng uıymdastyryldy. Janashyr azamatty aqtyq saparǵa shyǵaryp salýǵa halyq kóptep jınaldy. Qaıǵydan qan jutqan marqumnyń jaqyndaryna kóńil aıtyp, el aǵasynyń jarqyn beınesi máńgi el jadynda qalatynyna sendirdi.
foto:strategy2050.kz
