Qytaıda qıssa synyptary ashyla bastady
ASTANA. 7 qyrkúıek. QazAqparat - Qazaq aýyz ádebıetin jańǵyrtý, urpaq sanasyna sińirý maqsatynda Qytaıdaǵy qazaq mektepterinde Qıssa synyptary ashyla bastady.
Jýyrda Shyńjańnyń Tarbaǵataı aımaǵyndaǵy № 2 orta mektepte qıssa synyby ashylǵanyn sondaǵy aımaqtyq BAQ-tardyń biri - Tarbaǵataı aqparattyq saıty (http://www.kztcxw.cc) habarlady, dep jazady BAQ.KZ.
Bul synypty ashýdan buryn oqytýshylar qıssa-dastandardy jınap, kólemi jetkinshekter túsine alatyn deńgeıde, shaǵyn degenderin iriktep zerttegen eken. Ustazdar qıssa oryndaý sarynyn úıretý barysynda aýyz ádebıetin zertteýshi mamandar men aýyldaǵy qarııalerdyń keńesine júginipti.
Qıssashylar jetekshisi Kábıra Músinatqyzynyń aıtýyna qaraǵanda atalmysh mektepte «Oqýshylardy jan-jaqty baýlý» 2007 jyldan bastap oqytý baǵdarlamasyna engen. Al, qıssa oryndaýdy úıretý osy oqytý baǵdarlamasynyń «Kóne jazbalardy zertteý» taqyrybyna jatatyn tálimgerlik túri bolyp sanalmaq. «Toptyq qıssa oryndaýdan jeke oryndaýǵa kóship otyratyn sabaǵymyzdyń alǵashqy nátıjesi kóńil tolarlyq. Bizdiń maqsatymyz - qıssa jattatyp, ony oryndatý arqyly balalardyń talantyn ushtap, ónerin damytý» deıdi synyp jetekshisi.
